Қазыналы қарттар игі істердің ұйытқысы болып, ұрпақ тәрбиесіне ұлағатын қалдыруды өздерінің берік ұстанымына айналдырып келеді. Қарасай аудандық ардагерлер ұйымының құрамында 1 қалалық, 10 ауылдық ардагерлер ұйымы, сондай-ақ «Асыл ана» қоғамдық бірлестігі мен 55 бастауыш ұйым бар. Аудандық ардагерлер кеңесінің төрағасы Сағат Мәсімақынов аталған ұйымдардың жыл ішінде атқарған жұмыстарын саралады.
Бүгінде ауданда Екінші дүниежүзілік соғысқа қатысқан ардагерлерден ешкім қалмады. Тыл еңбеккерлерінің өзінен 406 ардагер ғана бар. Чернобыль апатына қатысқандар саны – 57, Ауған соғысының ардагерлер саны – 249, өңірдегі зейнеткерлер 30114 адамды құрайды.
Баяндама барысында айрықша жұмысымен көзге түскен ұйымдар аталды. Мәселен, Бекболат ауылдық ардагерлер ұйымында зейнеткер жасындағы адамдардың құқықтарын қорғау және оларға әлеуметтік жағынан қамқорлық көрсету жақсы жолға қойылған. Сол сияқты О.Жандосов атындағы ардагерлер ұйымындағы жұмыста да жүйелілік бар деп айтуға болады. Аталған елдімекенде этнос өкілдерінің мәдениетін дәріптеу, ата-бабадан келе жатқан салт-дәстүрді, әдет-ғұрыпты қастерлей білу жағы басымдау екені олардың мәртебесін көтеріп, абыройын асқақтатып жүр. Ал Жібек Жолы ауылдық ардагерлер ұйымындағы ынтымақ пен бірлік, Әйтей ауылындағы жастар тәрбиесіндегі жақсы істер жан сүйсінтеді.
Ұйым жұмысына өз тарапынан қанағаттанарлық баға берген Ұмтыл ауылдық ардагерлер ұйымының төрағасы Елтай Хасенов өткен жылы аудандық мәслихаттың қолдауымен 50-дей ардагер Түркістандағы қасиетті орындарда болып қайтқанын мақтанышпен әңгіме арқауына айналдырды. Сол сияқты Үштөбе қаласында өткен заңғар жазушы Кемел Тоқаевтың 100 жылдық мерейтойына ардагерлердің қатысқаны ұмытылмас сәттер екенін тілге тиек етті.
Жиында Әйтей ауылдық ардагерлер ұйымының төрағасы Амангелді Шәріпқұлов аудандық ардагерлер ұйымының қашан болса да жақсы істердің жанашыры болып жүргеніне арнайы тоқталды. Елтай ауылдық ардагерлер ұйымының төрағасы Есенгелді Салибеков те өз ой-пікірін ортаға салды. Ол аудандағы ардагерлер Жаңабай Құлшиев ақсақалдың Қарқарада өткен «Қымызмұрындық» байқауында бата беруден облыста екінші орын иеленгенін ыстық ықыласпен атап өтті.
Жиында сөйлеушілер қатары көп болды. Олардың қай-қайсысы болса да салауатты өмір салтын қалыптастырудағы ұйымның белсенділігін сөз етті. Бұл орайда Іргелі ауылындағы Болат Бұршақбаев, Қалиахмет Көшкенбаев, Тілеухан Әлімбаев, Пазыл Тәжмұрат, Амандолла Әбдімұратов, тағы басқа ардагерлердің аттары атқарып жатқан жұмыстары арқылы әспеттелді. Жаңадан құрылған «Асыл ана» қоғамдық бірлестігінің төрайымы болып Ұлтусын Бархинова сайланды.
Осы жылы ардагерлер ұйымдарының төрағалары болған Елтай Хасенов, Қалида Қосшығұлов, Базаркелді Анисов, Амангелді Толымбековтер «Алматы облысының Құрметті ардагері» төсбелгісімен марапатталды. Ардагерлер қауымы ұйымның жыл ішіндегі жұмысына қанағаттанарлық баға берді. Сонымен бірге алдағы міндеттер мен іс-шаралар жоспарын бекітті.
Қанат ТӘКЕБАЕВ,
Қаскелең қалалық ардагерлер
ұйымының төрағасы
Қарасай ауданы