Еңбекшіқазақ ауданы Нұра ауылында «Құсбегілік» ұлттық спорт түрінен Алматы облысының чемпионаты өтті. Бүркітшілер ауылы атанған Нұра ауылындағы «Бүркіттөбеге» жарысқа қатысушылардан бөлек, ұлттық спорт түрінен ұйымдастырылған жарысты тамашалауға келген аудан тұрғындары мен қонақтары да көп жиналды.
Облыстық біріншілікке Қонаев қаласы мен өңірдегі барлық ауданнан 40 құсбегі – аң аулау шебері қатысып, бақ сынасты. Жарыс қатысушылардың жасына қарай жастар және ересектер санаттары бойынша өтті.
Бірінші кезеңде бүркітшілер құстарын басқару қабілетін көрсетті. Турнир шарты бойынша құс өз иесін тауып, оған қайтып келгенде иесінің қолына қонуы керек. Екінші кезеңде жыртқыш құстар жабайы табиғатта олжасын аулау мүмкіндіктерімен бағаланды.
Сайыс қорытындысына сай Еңбекшіқазақ пен Кеген аудандарының құсбегілердің құстарының бабында екенін көрсетіп, көптің көзіне түсті. Жастар арасында бүркіт баптаған, қаршыға мен сұңқарын сайысқа қосқан құсбегілерден бірінші орынды Досымжан Жамбыл, Бекасыл Сейітжан және Әлдияр Ақбар алды. Ал ересектер арасында алтын бүркітші Ермұхан Бәйетбайға бұйырса, қаршыға мен сұңқар иелері Аян мен алмас Сейтжандар бірінші орыннан көрінді. Жеңімпаздар мен шеберлік шыңынан көрінген қатысушыларға медаль мен сыйлықтар табысталды. Сондай-ақ жүзден жүйрік шыққандар ақпан айының аяғына қарай өтетін республикалық турнирге жолдама алды.
Құралай МҰРАТҚЫЗЫ
