Еліміздегі оқу мәдениетін қалыптастыруға бағытталған игі бастама биыл да өз жалғасын тапты. Ұлттық кітап күніне орай Қонаев қаласындағы орталық кітапханада «Ауылға кітап» жобасы аясында шалғай аудандардағы жаңа ашылған жастар орталықтарына кітаптар табысталды.
Мәдени шарада Қазақстан Жазушылар одағының мүшесі, ақын, «Өлке тынысы» ЖШС директоры Кәдірбек Құныпияұлы мен белгілі қаламгер Алтыншаш Жақиянова мол рухани қазынаға жол ашатын жоба жайлы ізгі ойларын ортаға салды.
– «Адамды адам еткен – кітап, адамзат еткен – кітапхана» деген екен жазушы Әбіш Кекілбаев. Шындығы сол, кез келген белгілі тұлғадан осы деңгейге жету жолын сұрасаңыз, ол өзінің қалыптасу барысын міндетті түрде оқыған кітаптарымен байланыстыратыны анық. Бүгінде әлеуметтік желінің заманы десек те, кітаптың орнын басатын ешқандай парасат құралы жоқ. Өйткені парақтап оқыған дүние тасқа басқан таңбадай есте қалады. Жастар кітап оқумен бірге, мерзімді баспасөзге де баса назар аударғаны жөн. Өйткені газет пен кітап жастарды санасы сарабдал, ойлы да сауатты оқырман болуға жетелейді, – деді Кәдірбек Құныпияұлы.
Ақын Алтыншаш Жақиянова жастар арасында кітап оқу мәдениетін қалыптастырудың өзектілігі мен рухани құндылықтарды ұрпақ бойына дарытудың маңыздылығын тілге тиек етті. Сонымен қатар өз кітаптарын жастарға сый ретінде тарту етті.
Биыл «Ауылға кітап» жобасы шеңберінде құны 2 миллион теңгеге бағаланған 500 кітап Балқаш, Кеген және Райымбек аудандарындағы жаңа ашылған жастар орталықтарына табысталды. Бұл игі бастамаға М. Әуезов атындағы Әдебиет және өнер институты қолдау көрсетіпті.
Облыстық жастар ресурстық орталығы ұйымдастыру бөлімінің жетекшісі Еламан Төлепергеннің айтуынша, сыйға берілген кітаптардың құндылығы зор. Олардың қатарында «Жыраулар поэзиясы», «Ұлы дала ойындары», «Алпамыс батыр», «Абай», «Мұхтар Әуезов», «Алаш қайраткерлері және ұлттық фольклор» сынды танымал еңбектер бар. Ауыл жастарының қазақ руханияты мен мәдениетіне терең бойлап, кітапқа деген қызығушылығын арттыруда аталмыш жобаның берері мол болмақ.
Ерзат АСЫЛ
