Қарасай ауданы Елтай ауылдық округінде ардагерлер мен аналар ұйымдары, ауылдық кітапхана және Мәдениет үйі ұйымдастырған «Аталардың ақ батасы» атты батагөйлер байқауы өтті.
«Батамен ер көгерер, жаңбырмен жер көгерер» деген қазақи қағиданы берік ұстанған қатысушылар байқау талаптарын мүлтіксіз орындауға барын салды. Байқауға Е.Сәлибеков, Береке ауылдық ақсақалдар алқасының төрағасы А. Көшербаев, зейнеткер-ұстаз Б.Сіләмова сияқты қадірменді қариялар төрелік етті.
Байқау қорытындысы бойынша бірінші орынды Қ.Мерейімов, екінші орынды Т.Исабеков, үшінші орынды Қ.Кейікова иеленді. Жеңімпаздар Алғыс хаттар және дипломдармен марапатталды. Бұл іс-шараның ойдағыдай өтуіне кітапхана меңгерушісі Жәмила Қарқынбаева мен Мәдениет үйінің директоры Қ.Измахановтың қомақты үлес қосқанын атап өткен артық болмас.
Шараға жиналған көпшілік «Асыл қазына» ансамблінің есептік концертін тамашалады. Қарт өнерпаздар таңдай қақтырарлық тамаша өнерлерімен көрерменді тәнті етті. Олардың арасында мың бұралған биші де, күйші де, бұлбұл көмей әнші де баршылық.
Құрылғанына төрт жыл ғана болған ансамбльдің осы күнге дейінгі жетістіктері аз емес. Алматы қаласында өткен «Өнерлі елдің өресі биік» атты республикалық байқауда «Хормен ән салу» номинациясында бас жүлдені, «Анаға құрмет» музейінің 10 жылдығында «Дәстүрді дәріптеген әжелер» байқауында жүлделі ІІІ орынды иеленсе, биыл Түркістан қаласында өткен республикалық «Шуақты шақ» байқауында бас жүлдені қанжығаға байлап қайтты.
Сөйтіп, Елтай ауылында бір күнде өткен қос шараға жұртшылық дән риза болып, қошеметпен қол соғып тарқасты.
Қанат ТӘКЕБАЕВ
Қарасай ауданы
