Алматыдағы 28 гвардияшы-панфиловшылар атындағы саябақта Жеңіс эстафетасын табыстау салтанаты өтті. Мемориал алдына әскери қызметкерлер, Ауған соғысының және шекара қызметінің ардагерлері, сондай-ақ әскери-патриоттық клубтардың тәрбиеленушілері, облыс және қала тұрғындары жиналды.
Халықаралық «Жеңіс эстафетасы» әскери-патриоттық акциясы Жеңістің 80 жылдығына арналып ұйымдастырылды. Салтанатты шара соғыста көз жұмған жауынгерлерді бір минут үнсіздікпен еске алып, монументке гүл шоқтарын қоюдан басталды. Жиналғандар ерлікпен қаза тапқан сарбаздарға осылай құрмет көрсетті.
Жетісу облысының шекарашылары эстафетаның символы – шыны колбаны ҚР ҰҚК ШҚ Алматы облысы бойынша департаментіндегі әріптестеріне тапсырды. Жеңіс эстафетасы жаудың алғашқы соққысын шекарашылар күтіп алған батыр қала – Бресттен бастау алады. Олардың табандылығы ұрпақ үшін мойымас ерліктің үлгісі болып қала береді. Міне, бүгінде сол естеліктің символы Қазақстан жерінде – Алматы қаласында жалғасын тауып отыр.
Жеңіс символын салтанатты түрде қабылдаған шекарашылар: «Біз, бүгінгі сарбаздар мен офицерлер, осы эстафета мен жауапкершілікті қастерлеп, қабыл аламыз. Бейбітшілікті сақтау, шекараны қорғау – біздің қасиетті борышымыз», – деді.
ҚР ҰҚК Шекара қызметі Алматы облысы бойынша департаментінің бастығы, полковник Әлібек Каюпов:
– Жауды алғашқы болып шекарадан тосып алып, қасық қандары қалғанша шайқасқан шекарашылар болатын. Бұл ерлік ешқашан ұмытылмауы тиіс, – деді өз сөзінде.
Жеңіс эстафетасы өз жолын Брест қамалынан бастады, Беларусь, Ресей елдері мен қазақстанның Шығыс Қазақстан, Абай және Жетісу облыстары арқылы жүріп өтті. Ол Алматыдан ары қарайғы жолын Қордай шекарасында жалғап, сол жерде Қырғыз шекарашыларына табыс етіледі. Осы оқиғаның бір қатысушысы, «Жас шекарашы» әскери-патриоттық клубының тәрбиеленушісі, 8-сынып оқушысы Балнұр Махмет:
– Біз осы клубтың арқасында шекарашылардың өмірімен және қызметімен танысып жатырмыз, олардан көп нәрсені үйренудеміз. Ал бүгін Жеңіс эстафетасын табыстау сияқты тарихи сәттің куәсі болып тұрмыз. Бұл біз үшін ұмытылмайтын естелік, – деп пікір білдірді.
Шара мерекелік концертпен аяқталды. Астанадан келген ҚР ҰҚК Шекара қызметі әскери-патриоттық қызмет басқармасының ансамблі соғыс жылдарындағы сарбаздар майданға шырқап аттанған әндерді орындады.
Саябақ аллеясында Алматы мемлекеттік архиві әзірлеген «Соғыс жаңғырығы» көрмесі ұйымдастырылды. Келушілер назарына 40-қа жуық экспозиция ұсынылды. Олардың ішінде майдан хаттары, марапаттар, әскери фотографиялар мен сол жылдары басылым беттерінде жарық көрген жарияланымдар болды.
Бейбіт МЕКЕЕВ
