«AMANAT» партиясы Алматы облыстық филиалы жанындағы партиялық бақылау комиссиясы Қарасай ауданының Жаңатұрмыс ауылындағы сумен жабдықтау нысандарының құрылыс барысын тексерді.
Мердігер ұйым өкілдерінің айтуынша, Жаңатұрмыс ауылындағы құрылыс жұмыстары биыл қазан айының соңына дейін толық аяқталады.
Аудан әкімінің орынбасары Рүстем Атшабаровтың мәліметінше, бүгінде Жаңатұрмыс және Қаратөбе ауылдарында су жүйесін тарту жұмыстары жүргізілуде. Жобалардың жалпы құны – 1,3 млрд теңгеден асады. Сонымен қатар Елтай, Жармұхамбет, Шалқар және Қайрат ауылдарында да құрылыс-монтаждау жұмыстары басталған. Биыл бұл мақсатқа 1,8 млрд теңге бөлініп отыр. Жалпы жобаларды толық аяқтау үшін 5,1 млрд теңге қажет.
Бұдан бөлек, Кемертоған ауылындағы ауыз су жүйесін қайта жаңғыртудың бірінші кезеңіне арналған жобалау-сметалық құжаттары әзірленіп, 4,8 млрд теңгеге бюджетке өтініш тапсырылған.
Сондай-ақ Қаскелең топтық су құбырының құрылысы да жүріп жатыр. Жоба нәтижесінде 1 қала мен 17 ауыл ауызсуға қол жеткізеді. Оның ішінде Ұмтыл ауылдық округіне қарасты Жалпақсай, Алмалыбақ, Көлді және Мерей ауылдары да бар.
«Сайлауалды бағдарлама аясында Алматы облысында 2023–2027 жылдар аралығында 420 мыңнан астам адам тұратын 56 ауыл мен 2 қалада сумен жабдықтау жүйесін жаңғырту және салу көзделген. Қарасай ауданындағы бірнеше ауылда құрылыс басталып та кетті. Партиялық бақылаудың мақсаты – осы жобалардың сапалы әрі мерзімінде орындалуын қамтамасыз ету», – деді «AMANAT» партиясы Алматы облыстық филиалы атқарушы хатшысының орынбасары Аслан Кубентаев.
Партия өкілдерінің айтуынша, халықты ауыз сумен қамту – өңірлік сайлауалды уәделердің маңызды бөлігі. Сондықтан әрбір нысанның нақты орындалу барысы партиялық бақылау аясында қадағаланады.
