Қазақстан Республикасының Мемлекеттік рәміздер күніне орай «Тұғырлы Туым» атты ауқымды патриоттық акция өтті. Бұл күні барлық аудан-қалада бір мезетте Мемлекеттік Ту көкке көтеріліп, елдік пен бірліктің белгісі ретінде ұлықталды.
Мерекелік шаралардың басты бөлігі Іле ауданының Өтеген батыр кенті мен Қонаев қаласының 5-жағажайында ұйымдастырылды. Таңғы сағат 9:00-де Өтеген батыр ауылындағы Ту тұғыр маңына жиналған көпшілік Гимнді бірге шырқап, Көк байрақтың көкке көтерілу сәтіне куә болды.
Мерекелік шараға облыс әкімі Марат Сұлтанғазиев қатысты. Аудандағы бүкіл мекеме, ұжым өкілдері салтанатты сап түзеп, Мемлекеттік Ту желбіреді. Жиналғандар алдында шағын концерт берілді. Облыс әкімі Марат Сұлтанғазиев жұртшылықты Мемлекеттік рәміздер күнімен құттықтады.
– Тәуелсіздіктің ақ таңы атқан сәттен бастап, қол жеткізген жетістіктеріміздің арқасында шырқалған Гимніміз бен желбіреген Туымыз арқылы күллі әлем Қазақстан атты бейбітшілік пен ынтымақтың ордасына айналған мемлекетімізді таныпбілді. Бұл халқымыздың рухы мен отансүйгіштік қасиеттерін одан әрі арттыра түсті. Тәуелсіздігіміздің тұмарына айналған рәміздерімізді қастерлеу, оларға құрметпен қарау – әрбір қазақстандықтың қасиетті парызы, – деді облыс басшысы.
Ары қарай шара концерттік бағдарламаға ұласып, патриоттық әндер шырқалды. Мерекенің екінші кезеңі Қонаев қаласындағы 5-жағажайда жалғасты. Қала көшелерімен өткен «Тұлпар» ретро көліктер шеруі мерекеге көрік беріп, жағажай алаңына тізіліп қойылды. Қала әкімінің құттықтауынан соң, концерттік бағдарлама ұсынылды. Көпшіліктің ерекше ықыласына бөленген сәт кәсіби флайбордшы Олеся Колесниченконың су үстіндегі көрінісі болды. Ол катерлер мен желкенді қайықтардың арасында әуеге көтеріліп, акробатикалық өнер көрсетті. Мазмұнды жиынды аудандық және қалалық Мәдениет үйі өнерпаздары жалынды жыр, айшықты арнауларымен ажарландырды.
Қазақстан Республикасының Мемлекеттік рәміздер күніне орай Алатау қаласы «Еңбек» ықшамауданында мерекелік салтанатты жиын өтті. Оған қала әкімі Әркен Өтенов, қалалық мәслихат депутаттары, белсенді азаматтар, ақсақалдар мен аналар кеңесінің мүшелері және ауыл тұрғындары қатысты.
Алғашқы болып сөз алған Алатау қаласының басшысы Әркен Хамитұлы жұртшылыққа ізгі тілегін жеткізді.
– Тәуелсіздігіміздің тұмарына айналған рәміздерімізді қастерлеу, оларға құрметпен қарау – әрбір қазақстандықтың қасиетті парызы. Себебі Мемлекеттік рәміздер – ұлтымыздың тағдыры мен тарихын, ел ертеңіне деген сенімді бейнелейтін биік рухтың белгісі. Қаламызда ел намысын қорғай отырып, Көк Туымызды асқақтатып жүрген азаматтар жетерлік. Солардың ішінде Назым Қызайбай, Әсел Тоқтасын мен Регина Тибенованы ерекше атауға болады. Олардың төккен тері мен зор жетістігі біз үшін үлкен мақтаныш, – деді ол.
Қала әкімінің құттықтауынан кейін жергілікті әншілер өз өнерлерін көрсетті. Шара барысында «Ауыл аналары және әлем» қоғамдық бірлестіктің төрайымы Патима Арсмазы ақжарма тілегін арнады.
– Мен қазақстандықтарды еліміздің Мемлекеттік рәміздер күнімен шын жүректен құттықтаймын. Біздің «Ауыл аналары және әлем» қоғамдық бірлестігіне биыл 20 жыл толып отыр. Осы жылдар аясында 10 миллион баланы демалыс аймақтарына жіберіп, оларды жаңа оқу жылына дайындауға атсалысып келеміз. 960- тан астам көпбалалы анаға көмек қолын ұсыныппыз. Әлі де болса бірлестік қаланың дамуына бір кісідей атсалысатынына нық сенімдімін, – деді ол.
Алатау қалалық ардагерлер кеңесінің төрағасы Асқар Юсупов болса, жаңа қаланың болашағы жарқын боларына сенім білдіріп, ақ батасын берді.
