Жамбыл ауданы Үмбетәлі ауылында белгілі жазушы, журналист Нағашыбек Қапалбекұлының 75 жасқа толуына арналған «Тау баласы» атты шығармашылық кеші өтті. Мерекелік шараға Жамбыл ауданының әкімі Нұрлан Ертас қатысып, қазақ әдебиетінің көрнекті өкілін мерейтойымен құттықтады.
Шараға келгендер алдымен Үмбетәлі ақынның кезінде өзі тұрған қара шаңырағында Құран оқытып, музейімен танысты. Әдеби-сазды кеш осы ауылдағы ақын атындағы мектепте өтті. Аудан басшысы Нағашыбек Қапалбекұлының бүгінге дейін елуден астам кітап шығарғанын атап өтіп, елі мен жері үшін атқарып жатқан қайраткерлік еңбегіне тоқталды. Ол құрастырып шығарған Жамбылдың 40 томдық, Сүйінбай ақынның 10 томдық жинағы және басқа да талай тарихи тұлға жайлы зерттеулеріне баса тоқталды.
Әдеби кешке Қазақстан Жазушылар одағынан бір топ қаламгер арнайы қатысып, мерейтой иесіне деген жылы лебіздерін білдірді. Жазушылар одағы басқармасы төрағасының орынбасары Қасымхан Бегманов Нағашыбек Қапалбекұлының шығармашылық жолына тоқталып, оның қазақ әдебиетіне қосқан елеулі үлесін атап өтті. Сондай-ақ филология ғылымдарының докторы, Қазақ ұлттық қыздар педагогикалық университетінің профессоры Гауһар Балбабаева жазушы шығармашылығы туралы баяндама жасады. Әдебиеттанушы, сыншы Армиялбек Сағындықұлы, «Шалқар» радиосының директоры, философия ғылымдарының кандидаты Болатбек Төлепберген және ауыл тұрғындары ақ тілегін білдірді. Әріптестері мен замандастары Нағашыбек Қапалбекұлының қазақ әдебиетіне қосқан зор үлесін, терең ойлы туындылары арқылы ұлттық рухты, туған жерге деген сүйіспеншілікті дәріптегенін ерекше атап өтті.
Кешті жүргізген Үмбетәлінің немересі, ақын, суретші Әуелбек Ысқақов Нағашыбек Қапалбекұлының шығармалары бүгінгі ұрпақ үшін рухани қазына екенін айтты. Оның қаламынан туған әрбір шығарма – адамдық қадір-қасиетті қастерлеуге, еңбекті бағалауға және ұлттық құндылықтарды құрметтеуге шақырады. Кезінде осы ауылға халық ақыны Үмбетәлі Кәрібаевтың есімін беруге және музейін ашуға жазушы көп еңбек сіңірген. Мұрағаттан өлең-жырларын жинап, екі томдық шығармалар жинағын құрастырып шығарды.
Шара барысында жергілікті өнерпаздар қаламгер туындыларынан үзінді оқыды, Үмбетәлі атындағы орта мектеп ұжымы өнер көрсетті. Нағашыбек Қапалбекұлы жас оқырмандардың қойған сұрақтарына жауап беріп, ұрпаққа тағылым болар ой-пікірімен бөлісті.
Серік САТЫБАЛДИЕВ
Жамбыл ауданы