Кеген ауданы Қарқара ауылдық кітапханасында Ұлттық кітап күніне орай кітап түні акциясы өткізілді. Кеш барысында кітап көрмесі ұйымдастырылып, оқырман назарына түрлі жанрдағы әдебиеттер ұсынылды. Сонымен қатар қатысушылар өздері оқыған сүйікті кітабы туралы ой бөлісіп, пікірін ортаға салды.
Кеш барысында әдеби қызықты ойындар өткізіліп, белсенді қатысқан оқырмандар марапатталды. Кітап кейіпкерлерінен шағын көрініс қойылып, өлеңсүйер қауым ақын-жазушылардың шығармаларын мәнерлеп оқыды. Осындай тағылымды шаралар арқылы кітапқа деген сүйіспеншілік артып, білімге құштар ұрпақ қалыптасары сөзсіз.
Қазіргі жаһандану дәуірінде білім мен руханияттың маңызы бұрынғыдан да арта түсті. Сан түрлі ақпарат көздері көбейген заманда адамның ой-өрісін кеңейтіп, дүниетанымын қалыптастыратын ең сенімді құрал – кітап. Кітап – ұлттың рухани қазынасы, ұрпақтан-ұрпаққа жалғасқан асыл мұра. Сондықтан да кемел болашаққа бастар жол ең алдымен кітаппен тығыз байланысты.
Кітап оқу – тек білім алу ғана емес, ол адамды тәрбиелеудің, ойлау қабілетін дамытудың, тіл байлығын арттырудың ең тиімді жолы. Кітап арқылы адам өткен тарихты таниды, ертеңгі күнге бағыт-бағдар жасайды. Әрбір оқылған шығарма оқырманның жандүниесіне әсер етіп, оны ізгілікке, адамгершілікке, парасаттылыққа жетелейді.
Әсіресе, жас ұрпақ үшін кітаптың орны ерекше. Бүгінгі оқырман – ертеңгі ел тірегі. Сондықтан жастардың кітапқа деген қызығушылығын арттыру – қоғамның басты міндеттерінің бірі. Кітап оқыған бала ойлы, саналы, білімді болып өседі. Ол өз елінің тарихын, мәдениетін құрметтеп, болашағына жауапкершілікпен қарайды.
Қазіргі технология дамыған заманда кітаптың орны төмендейді деген пікірлер айтылып жатады. Алайда қандай заман болса да, кітаптың құндылығы ешқашан жойылмайды. Ең бастысы – оқу мәдениетін сақтап, оны жаңа деңгейде дамыту.
Кітапхана – білімнің ордасы, рухани орталық. Мұнда әр оқырман өзіне қажетті мәлімет алып қана қоймай, рухани тынығып, ой-санасын байытады.
Қорыта айтқанда, кітап – кемел болашақтың кепілі. Кітаппен дос болған адам ешқашан адаспайды, өз жолын табады. Сондықтан әрқайсымыз кітап оқуды өміріміздің бір бөлшегіне айналдырып, білімді де бәсекеге қабілетті ұрпақ тәрбиелеуге атсалысуымыз қажет. Кітаппен бірге алға басқан елдің болашағы әрқашан жарқын болмақ.
Ақмарал Тұрсынова,
Қарқара ауылдық кітапханасының қызметкері
Кеген ауданы
