Қонаев қаласында Алматы облыстық сот ғимаратының іргетасы қаланып, құрылыс жұмысы басталды. Осыған орай уақыт капсуласын салу рәсімі өтіп, шараға ҚР Жоғарғы Сотының төрағасы Асламбек Мерғалиев пен Алматы облысының әкімі Марат Сұлтанғазиев қатысты.
Ғимараттың жалпы ауданы 12 мың шаршы метрден асады. Нысан 5 қабаттан тұрады. 22 сот залы, жұмыс кабинеттері мен жертөлесі бар. Барлық қауіпсіздік талаптары ескерілген. Құрылыс 15 ай бойы жүргізіліп, келесі жылы пайдалануға беріледі. Ол үшін сапалы техника мен білікті мамандар жұмылдырылған. Қазіргі таңда жер қазу жұмыстары басталып, 40 адам еңбек етуде. Алдағы уақытта жұмысшылар саны 100-ге дейін ұлғаяды. Мердігер мекеме – «МК Технострой сервис» ЖШС.
Қонаев қаласында құрылыс қарқыны мұнымен шектелмейді. Облыс орталығында биыл алты бірдей еңселі ғимараттың іргесі қаланады. Осы уақытқа дейін инфрақұрылымды дамыту, су, газ, кәріз құбырын тарту, сондай-ақ жобалау шаралары атқарылған.
«Қазіргі таңда Қонаевта 6 нысан бекітілген кестеге сәйкес салынып жатыр. Бұл жобалар мемлекеттік органдар жұмысының тиімділігін арттырып, Қонаев қаласының көркін аша түседі», – деді Алматы облыстық құрылыс басқармасының басшысы Жасұлан Оңалбаев. Атап айтқанда, Ұлттық Қауіпсіздік комитеті құрылымдары мен облыстық сотқа, полиция департаментіне, Сыбайлас жемқорлыққа қарсы қызмет әкімшілігіне, облыс әкімдігіне қарасты мекемелерге арналған нысандар мен департаменттер үйі бой көтереді. Одан бөлек, облыс орталығында дене шынықтыру-сауықтыру кешені, драма театры, «Қонаев-Арена» көпфункционалды кешені, 600 орынды кітапханамен қамтылған Оқушылар сарайы, зертханасы бар музей салынады деп жоспарланған. Бұл өңір экономикасына серпін беріп, жаңа жұмыс орындарын ашуға жол ашады. Осылайша, Қонаев әкімшілік-іскерлік басқару орталығына әрі мәдениет пен руханият ошағына айналады.
Гүлзат БАЙҚОНЫС
