Алматы облысында республикалық маңызы бар жолдарды орташа жөндеу бойынша 307 шақырымды құрайтын 11 жоба жүзеге асырылуда. Оның ішінде 6 жоба Кеген және Райымбек аудандарында, 1 жоба Ұйғыр ауданында, 3 жоба Еңбекшіқазақ және 1 жоба Қарасай аудандарында іске асырылуда.
Кеген және Райымбек аудандарындағы «Кеген-Нарынқол» автомобиль жолының 0-37, 37-74 шақырымы, «Көкпек-Кеген-Тюп» автомобиль жолының 26-41, 68-88 шақырым аралығын орташа жөндеу жүргізіліп жатыр.
Ұйғыр ауданындағы «Көктал–Қорғас» автомобиль жолының 230-272 шақырым аралығы бойынша былтыр 42 шақырым ресайкерлеу жəне жабынның төменгі қабаты салынды.
Еңбекшіқазақ ауданында “Байсейіт-Көкпек-Шонжы-Көктал” жолының 0-6, 40+700-42+800 шақырымында жұмыстар аяқталуға жақын.
Еңбекшіқазақ және Қарасай аудандарындағы «Алматы-Бәйтерек-Бәйдібек би-Лавар» жолының 43-47, 76-88, 89-108 шақырымдары, «Алматы–Төңкеріс –Байсерке–Междуреченское» жолының 18-51 және Алматы-Астана тас жолының 27-42, 50-115 шақырымында орташа жөндеу жұмыстары қарқынды жалғасуда.
Аталған нысандардың жұмыстары мен материалдардың сапасына сараптама жасау “Жол активтері сапасының ұлттық орталығы” ШЖҚ РМК Алматы облысы бойынша филиалының үнемі бақылауында. Жыл басынан бері 5 тексеру жүргізіліп, 13 құрылыс материалдары сараптамадан өткізілді, оның 9 нормаға сәйкес, 4 зертханалық сыналуда және 5 ақау анықталған.
