Іле ауданында 2006–2008 жылы туған жасөспірімдер арасында белбеу күрестен Қазақстан Республикасының чемпионаты өз мәресіне жетті. Ауқымды жарысқа еліміздің әр өңірінен келген үздік жас балуандар қатысып, бұл дода жасөспірімдер арасындағы алдағы әлем чемпионатына қатысатын Қазақстан ұлттық құрамасын жасақтауда маңызды кезеңдердің бірі болды.
Белбеу күресі – қазақ халқының ұлттық дәстүріне негізделген белдесу спортының бір түрі. Бұл спорттың басты ерекшелігі – қарсыластың белбеуінен үздіксіз ұстап күресу. Сондықтан спортшылардан тек күш қана емес, жоғары үйлесімділік, шеберлік, жылдам реакция және тактикалық ойлау талап етіледі. Бүгінде белбеу күресі Қазақстанда ғана емес, халықаралық деңгейде де қарқынды дамып, ұлттық мұра мен заманауи спорттық бағытты ұштастырып келеді.
Жарыс еркін және классикалық стильдер бойынша өтті. Бұл екі стильдің басты айырмашылығы – аяқпен жұмыс істеу техникасында. Еркін стильде спортшыларға аяқпен іліп шалу, қағу және өзге де әдістер жасауға рұқсат етіледі, сондықтан белдесулер өте тартысты әрі динамикалы өтеді. Ал классикалық стильде негізгі басымдық дене мен қол арқылы орындалатын лақтыру әдістеріне беріледі. Қыздар арасында чемпионат тек еркін стиль бойынша ұйымдастырылды, себебі дәл осы бағыт халықаралық тәжірибеде және ресми ережелерде кеңінен қолданылады.
«Дәл осы 18–20 жас аралығында ел құрамасының болашақ резерві қалыптасады. Мұндай жарыстар спортшыларға маңызды тәжірибе жинақтап, халықаралық деңгейдегі бәсекелерге дайындалуға мүмкіндік береді. Алматы облысы соңғы жылдары белбеу күресін дамыту бойынша алдыңғы қатардағы өңірлердің бірі саналады. Облыс спортшылары республикалық жарыстарда тұрақты түрде жүлделі орындарға ие болып келеді, сондай-ақ ұлттық күрес түрлерімен айналысушылар саны жыл сайын артып отыр», – деді Алматы облысының жасөспірімдер арасындағы белбеу күресінен аға жаттықтырушысы Жәнібек Сұлтан.
Екі күнге созылған жарыс барысында спортшылар жоғары дайындық деңгейін, күш-жігерін, төзімділігі мен тактикалық шеберлігін көрсетті.
Ұлдар арасындағы классикалық стильде 100 келі салмақ дәрежесінде Алматы облысының өкілі Эмир Тажмұхамедұлы чемпион атанды.
«Мен – Қазақстанның екі дүркін чемпионымын. Алғашқы жеңісімді 2023 жылы кіші жасөспірімдер арасындағы Қазақстан чемпионатында жеңіп алдым. Спортпен Іле аудандық спорт мектебінде алты жылдан бері тұрақты түрде айналысып келемін және бірден үш күрес түрін меңгеріп жүрмін. Белбеу күресінен бөлек, дзюдо және қазақ күресі жарыстарына да қатысамын. Бұл чемпионатқа барлық өңірден өте мықты дайындалған спортшылар келді. Әр белдесу өте қиын әрі тартысты өтті. Жеңіске жеткеніме өте қуаныштымын. Ендігі басты мақсатым – жасөспірімдер арасындағы әлем чемпионатында жүлде алу. Жаттықтырушыларымның сенімін ақтау үшін бар күшімді салып дайындаламын», – деді жас спортшы.
Сондай-ақ ұлдар арасындағы классикалық стильде Қазақстан чемпионатының жүлдегерлері:
80 келі – Махамбет Нураддин – 2 орын;
90 келі – Абзал Алимхан – 3 орын.
Қыздар арасында жүлдегер атанғандар:
50 келі – Аяулым Искакова;
60 келі – Маржан Калмен;
65 келі – Шұғыла Сұлтан;
75 келі – Жанерке Жаппар.
Ал ұлдар арасындағы еркін стильде 65 келі салмақ дәрежесінде Санжар Нұрлыпанов 3 орынды иеленді.
