1-3 мамыр аралығында қарадалалықтар «Таза Қазақстан» экологиялыөқ бағдарламасы аясында ауқымды сенбіліктер ұйымдастырды. Бұл жолы сенбіліктерге тек мекеме қызметкерлері ғана емес, аудан тұрғындары, аудан аумағындағы демалыс орындарының жұмыскерлері, кәсіпкерлер атсалысты.
Қарадала аумағы туристік нысандарымен баршаға әйгілі. Арасан ыстық сулары, Шарын шатқалы – еліміз ғана емес, алыс-жақын шетелден келген қонақтардың да назарын аудартатын демалыс орындары. Бұл күндері дәл осы туристік аймақтарда тазалау жұмыстары жүрді.
Мыңға тарта тұрғын атсалысқан сенбілікте 16 тоннадан астам қоқыс жиналып, арнайы орындарға шығарылды. Бұл жолы Арасан ыстық су аумағындағы кәсіпкерлер де үлкен белсенділікпен кірісіп, табиғат-ананың тарту еткен аумағын тазалауға бір кісідей үлес қосты. Техникамен қамтамасыз етіп, туған жеріміздің тазалығын сақтауға бұдан былай да жұмыла атсалысатындарын айтты.
Бұл күндері тек тазалық жұмыстары ғана емес, ағаш отырғызу шаралары да қатар жүрді. Аудан аумағында 400 түп көшет егілді. Тұрғындар болашақта бұл талдарды күтіп-баптау да назардан тыс қалмайтынына сендірді.
Бірлік күні мен «Таза Қазақстан» экологиялық бағдарламасы аясында Шарын мемлекеттік ұлттық табиғи паркі аумағында «Туған өлкемнің табиғаты» атты сурет байқауы да өтті. Ашық аспан астында, табиғат құшағында өткен сурет байқауы Шарын ұлттық паркі қызметкерлері мен Үлкен Ақсу орта мектебі оқушыларымен бірлікте өтіп, жас суретшілер қылқалам арқылы ақ параққа табиғаттың сұлулығын бейнелеп, туған жердің кереметтігін жүректерімен сезінді. Бұл шара тек өнер байқауы емес, жас ұрпақтың табиғатқа деген сүйіспеншілігн арттырып, оны қорғауға, аялап ұстауға деген жауапкершіліктерін арттыруға септігін тигізген айтулы шара болды.
Бұл күндердегі сенбіліктер осылайша ерекше өтті. Әр тұрғын тек есеп үшін емес, табиғатты қорғауға деген жауапкершілікті сезініп шыққанын аңғартты. Осылайша сөзбен емес, туған жерге деген махаббаттарын іспен дәлелдеген қарадалалықтар Мемлекет басшысының «Таза Қазақстан» экологиялық бағдарламасына өз үлестерін қосты.
Анар Дүйсенбайқызы
