Спортта жеңіс кездейсоқ келмейді. Жоғары нәтижеге жету үшін тәртіп, табандылық, жауапкершілік және нақты мақсат қажет. Мемлекеттің дамуы да осы қағидаларға негізделеді. Ел болашағына бейжай қарамайтын әрбір азамат қоғамдық және саяси үдерістерге саналы түрде қатысып, өз таңдауына жауапкершілікпен қарауы керек.
2026 жылғы 1 шілдеден бастап Қазақстан Республикасының жаңа Конституциясы күшіне енді. Жаңа конституциялық жүйе аясында бір палаталы заң шығарушы орган – Құрылтай қалыптасады. Ал Құрылтай депутаттарының алғашқы сайлауы 2026 жылғы 23 тамызға белгіленді. Бұл – еліміздің саяси өміріндегі маңызды тарихи кезең. (Адалет)
Алғашқы Құрылтайды қалыптастыру – жай ғана кезекті саяси науқан емес. Бұл – жаңа Конституцияда бекітілген нормаларды іс жүзінде жүзеге асыруға бастайтын жауапты қадам. Сондықтан әрбір азаматтың сайлауға қатысуы, кандидаттардың бағдарламаларын зерделеуі және саналы таңдау жасауы ерекше мәнге ие.
Спортшы жарыс алаңына шыққанда тек өзі үшін емес, бапкері, командасы, отбасы және елінің намысы үшін күреседі. Сол сияқты сайлау кезінде де азамат тек өзінің бүгінгі мүддесін ғана емес, мемлекеттің ертеңін, балалары мен келер ұрпақтың болашағын ойлауы тиіс.
Біздің спорт клубымызда жастарға дене дайындығымен қатар тәртіптілік, еңбекқорлық, адалдық және жауапкершілік қасиеттерін сіңіруге тырысамыз. Өйткені шынайы мықтылық тек күшпен өлшенбейді. Нағыз мықты адам – өз отбасына, қоғамына және Отанына жауапкершілікпен қарайтын азамат.
Жастар еліміздегі өзгерістерді сырттан бақылаушы ретінде қабылдамауы керек. Олар мемлекет өміріне белсенді араласып, өз пікірін заңды әрі өркениетті жолмен білдіруге үйренуі қажет. Азаматтық белсенділік дауыс беруден басталады. Өз таңдауын жасау – әр адамның ел тағдырына қатысы бар екенін сезінуінің көрінісі.
Құрылтайда қабылданатын заңдар мен шешімдер қоғамның дамуына, азаматтардың құқықтарына, білімге, спортқа, кәсіпкерлікке, әлеуметтік қолдауға және өскелең ұрпақтың мүмкіндіктеріне тікелей ықпал етеді. Сондықтан депутаттарды таңдау кезінде олардың біліміне, тәжірибесіне, елге қызмет ету ниетіне және халық алдындағы жауапкершілігіне назар аудару маңызды.
Сайлауға қатысу – біреудің тапсырмасы емес, әр азаматтың жеке таңдауы мен азаматтық ұстанымы. Біздің дауысымыз бір ғана белгі болып көрінуі мүмкін. Алайда миллиондаған азаматтың саналы таңдауы мемлекеттің даму бағытын айқындайтын үлкен күшке айналады.
Бүгін біз қабылдайтын шешімнің нәтижесін болашақ ұрпақ көреді. Сондықтан алғашқы Құрылтайдың қалыптасуына жауапкершілікпен қатысу – келер буын алдындағы ортақ міндетіміз.
Спортта соңғы секундқа дейін күреспеген адам жеңіске жете алмайды. Қоғамдық өмірде де бейжайлық ешқашан жақсы нәтижеге жеткізбейді. Елдің болашағы әрқайсымыздың белсенділігімізден, жауапкершілігімізден және саналы таңдауымыздан басталады.
Асанбаев Аңсар Құралбекұлы,
«Batyr Gym» спорт клубының директоры