Ақпараттық технологиялардың қарқынды дамуы адамдардың өмірін жеңілдеткенімен, интернет арқылы жасалатын алаяқтық қылмыстарының көбеюіне де жол ашты. Бүгінде алаяқтар әлеуметтік желілерді, мессенджерлерді, жалған сайттар мен телефон қоңырауларын пайдаланып, азаматтардың жеке деректері мен қаржысын заңсыз иемденуге тырысуда.
Интернет-алаяқтары өздерін банк қызметкері, құқық қорғау органы өкілі немесе мемлекеттік мекеме маманы ретінде таныстырып, азаматтарды алдап, банк картасының нөмірін, SMS арқылы келген кодты немесе жеке мәліметтерін сұрайды. Сонымен қатар жалған интернет-дүкендер, тиімді инвестиция немесе жоғары табыс уәде ететін қаржылық схемалар арқылы да адамдарды алдау фактілері жиі кездеседі.
Осындай қылмыстардың құрбаны болмас үшін әрбір азамат қарапайым қауіпсіздік ережелерін сақтауы қажет. Ешқашан бейтаныс адамдарға жеке деректеріңізді, банк картасының мәліметтерін немесе SMS-кодтарды бермеңіз. Күмәнді сілтемелерге өтпеңіз, белгісіз қосымшаларды жүктемеңіз және қаржылық операцияларды тек ресми қосымшалар мен сенімді сайттар арқылы жүзеге асыруға тырысыңыз.
Егер сізге күмәнді қоңырау немесе хабарлама келсе, әңгімені дереу тоқтатып, ақпаратты ресми ұйымның байланыс арналары арқылы тексерген жөн. Ал алаяқтыққа тап болған жағдайда уақыт оздырмай құқық қорғау органдарына хабарлап, банкке жүгіну қажет.
Интернет-алаяқтықтың алдын алудың ең тиімді жолы – цифрлық сауаттылықты арттыру және сақтық таныту. Қарапайым қауіпсіздік шараларын сақтау арқылы әрбір азамат өз қаражатын және жеке мәліметтерін қорғап, киберқылмыстың құрбаны болудан сақтана алады. Цифрлық қауіпсіздік – бүгінгі қоғамдағы әр адамның ортақ жауапкершілігі.