Нашақорлық – жеке адамның денсаулығына ғана емес, тұтас қоғамның қауіпсіздігі мен дамуына қауіп төндіретін өзекті мәселелердің бірі. Есірткіге тәуелділік адамның өмір сапасын төмендетіп, денсаулығын бұзып қана қоймай, қылмыс деңгейінің артуына, отбасының күйреуіне және жастардың болашағына кері әсерін тигізеді.
Қазіргі таңда есірткінің заңсыз айналымына қарсы күрес пен оның алдын алу мемлекеттік саясаттың маңызды бағыттарының бірі болып табылады. Құқық қорғау органдары есірткі өндіру, сақтау, тасымалдау және таратумен айналысатын тұлғаларды анықтау бойынша жүйелі жұмыстар жүргізіп, профилактикалық іс-шараларды тұрақты ұйымдастыруда.
Әсіресе жастар арасында есірткінің зияны туралы түсіндіру жұмыстарын күшейту аса маңызды. Өйткені есірткіні бір рет қолданудың өзі тәуелділікке әкелуі мүмкін. Көп жағдайда заңсыз заттарды таратушылар әлеуметтік желілер мен интернет платформаларын пайдаланып, жастарды түрлі уәделермен алдауға тырысады. Сондықтан күмәнді ұсыныстардан бас тартып, заңсыз әрекеттерге араласпау – әрбір азаматтың міндеті.
Нашақорлықтың алдын алуда отбасының, білім беру ұйымдарының және қоғамның рөлі ерекше. Балалардың бос уақытын тиімді ұйымдастыру, спортпен айналысуға, шығармашылықпен және қоғамдық жұмыстарға тарту – зиянды әдеттердің алдын алудың тиімді жолдарының бірі.
Есірткінің заңсыз айналымына қатысты қандай да бір ақпарат белгілі болса, оны жасырмай құқық қорғау органдарына хабарлау – қоғамдық қауіпсіздікке қосылған маңызды үлес. Қоғамның бейжай қарамауы ғана бұл індеттің таралуына тосқауыл бола алады.
Нашақорлыққа қарсы күрес – әрбір азаматтың ортақ міндеті. Салауатты өмір салтын насихаттау, заң талаптарын сақтау және жастардың дұрыс таңдау жасауына қолдау көрсету арқылы ғана дені сау, қауіпсіз әрі жарқын болашаққа қадам басамыз.