Қоғамдық қауіпсіздік – кез келген мемлекеттің тұрақтылығы мен азаматтардың әл-ауқатын айқындайтын маңызды фактор. Көшедегі тәртіптен бастап, қоғамдық орындардағы мәдениетке дейінгі көптеген мәселе азаматтардың өзара жауапкершілігіне тікелей байланысты. Сондықтан қауіпсіз қоғам құру тек құқық қорғау органдарының міндеті емес, барша тұрғынға ортақ жауапкершілік.
Бүгінде құқық бұзушылықтың алдын алуда халықпен кері байланыстың маңызы артып келеді. Тұрғындар өз ауласындағы, көшесіндегі немесе елді мекеніндегі мәселелерді дер кезінде айтып, тиісті органдарға хабарлай алса, көптеген келеңсіз жағдайдың алдын алуға болады. Бұл ретте учаскелік полиция инспекторларының, жергілікті атқарушы органдардың және қоғамдық ұйымдардың бірлескен жұмысы маңызды.
Қауіпсіздік мәдениеті ең алдымен отбасы мен мектептен қалыптасады. Баланы қоғамдық тәртіпті сақтауға, өзгенің құқығын құрметтеуге және қауіп төнген жағдайда дұрыс әрекет етуге үйрету – болашақтағы құқық бұзушылықтың алдын алудың тиімді жолы.
Қоғам мен полиция арасындағы сенім де осы үдерісте ерекше рөл атқарады. Азамат құқық қорғау органдарына дер кезінде жүгініп, өз мәселесінің шешім табатынына сенімді болса, қауіпсіздік деңгейі де артады. Демек, тәртіп орнату – бір тараптың емес, қоғамның ортақ ісі.
Тоғжан ЖОЛДЫҒАЛИ