Қоғамдағы қауіпсіздік бір ғана мекеменің немесе құқық қорғау органдарының жұмысына байланысты емес. Ол – әр азаматтың жауапкершілігі мен ортақ тәртібінен қалыптасатын құндылық.
Көшеде белгіленген тәртіпті сақтау, көлік жүргізгенде жол ережесін бұзбау, қоғамдық орында айналадағы адамдарға кедергі келтірмеу сияқты қарапайым әрекеттердің өзі қауіпсіз орта қалыптастыруға ықпал етеді.
Соңғы жылдары интернет кеңістігіндегі қауіптер де көбейді. Алаяқтар адамдардың сеніміне кіріп, түрлі сылтаумен банк картасының деректерін, құпия кодтарын немесе жеке мәліметтерін алуға тырысады. Мұндай жағдайда ең басты қорғаныс – азаматтың қырағылығы.
Бейтаныс адамның қоңырауына бірден сену, күмәнді сілтемеге кіру немесе жеке мәліметтерді айту үлкен мәселеге әкелуі мүмкін. Сондықтан кез келген ақпаратты тексеріп, күмәнді жағдай туындағанда тиісті органдарға хабарласқан дұрыс.
Балалардың қауіпсіздігі де үнемі назарда болуы тиіс. Ата-ана баласына жолдағы тәртіпті ғана емес, интернеттегі қауіпсіздік ережелерін де түсіндіргені жөн. Балаға қауіп төнген жағдайда кімнен көмек сұрау керектігін алдын ала үйрету маңызды.
Қауіпсіз қоғам құру үшін әр адам «бұл менің міндетім емес» деген көзқарастан арылуы керек. Күмәнді жағдайды байқап, тиісті қызметке хабарлау да азаматтық жауапкершіліктің бір көрінісі.
Құралбек СӘБИТҰЛЫ