Қазақстан Премьер-министрі Әлихан Смайылов бүгін үкімет отырысынан соң көктемгі егіс жұмыстары кезінде жанармай бағасы қалай реттелетінін түсіндірді. Премьер-министр шаруалар үшін дизель отынының бағасы егіс жұмыстары аяқталғанға дейін қымбаттамайтынын, кестеге сай толық көлемде берілетінін мәлімдеді.
«Көктемгі егіс жұмыстары аяқталғанға дейін фермерлер үшін дизель отынының бағасы өзгермейді. Операторлардың шығыстарын ескере отырып, республика бойынша орташа құны литріне 204 теңгені құрайды. Бұл ішкі нарықтағы қазіргі бағадан 15-20 пайызға төмен», – деді Смайылов.
Үкімет басшысы өңірлерге 413 мың тонна арзандатылған дизель отыны бөлінгенін, өткер жылмен салыстырғанда 13 мың тонна екенін айтты.
Сонымен қатар, Үкімет өңірлердің әкімдіктерімен бірлесіп арзандатылған отынды ауыл шаруашылығы өндірушілеріне жеткізуде бақылау шараларын күшейтпек.
«Біз арзандатылған дизель отынының қажетті көлемін бөліп жатырмыз. Бірақ кейбір операторлар арзандатылған дизель отынын барлық фермерлерге жеткізу бойынша өз міндеттемелерін толық орындамай отыр. Біз қазір мониторингті күшейтіп, барлық фактілерді тексереміз және жосықсыз операторларды жауапқа тартамыз. Болашақта біз олармен жұмыс істемейміз», — деді Премьер-министр.
