Жекеменшіктегі апатты жағдайда тұрған жылу желілерін коммуналдық меншікке берудің қажеттілігін анықтау керек. Бұл туралы Үкімет отырысында Премьер-министр Әлихан Смайылов айтты.
«Өңір әкімдіктері Энергетика, Индустрия және инфрақұрылымдық даму министрліктерімен бірлесіп, барлық тұрғын үй-коммуналдық шаруашылығы, тұрғын үй және әлеуметтік сала объектілерінің алдағы 2023-2024 жылғы жылыту маусымына дайындығы бойынша іс-шаралар жоспарын бекітіп, оны тез арада іске асыруға кірісуі қажет», – деді Әлихан Смайылов.
Сонымен қатар, Үкімет басшысы Индустрия министрлігіне Энергетика министрлігімен және өңір әкімдерімен бірлесіп, 1 маусымға дейін қолданыстағы жылу желілерінің жағдайына техникалық тексеру жұмыстарын аяқтауы керектігін ескертті.
«Осы жұмыстардың қорытындысы бойынша апатты жағдайдағы жекеменшік жылу желілерін коммуналдық меншікке берудің қажеттілігін анықтау керек. Нәтижесін жеке өзіме баяндаңыздар», – деді Премьер-министр.
Биыл қыста Екібастұз, Рудный және басқа да қалаларда жылу электр орталықтарында апат болып, ондаған ғимаратта тұрғындар жылусыз қалған. Осыдан кейін елімізде жылу орталықтарының жай-күйі, оларды жекеменшіктен коммуналдық меншікке алу мәселесі жиі көтеріле бастады. Ресми мәлімет бойынша, республикадағы жылу жүйелерінің 70-90 пайызға жуығы тозған, оларды жаңарту қажет.
