Қазақстан Республикасы Ұлттық экономика министрлігі Табиғи монополияларды реттеу комитетінің Алматы облысы бойынша департаменті табиғи монополия субъектісінің өзіне жүктелген міндеттемелерді, атап айтқанда, 2023-2024 жылдарға арналған инвестициялық бағдарламаның іс-шараларын орындау барысы туралы ашықтық және айқындық мақсатында «Қапшағай өңірінің газ желілері» ЖШС-ның нысандары бойынша БАҚ және тұтынушыларды хабардар ету үшін баспасөз турын өткізді. Оған Ұлттық экономика министрлігінің Табиғи монополияларды реттеу комитеті Алматы облысы бойынша департаментінің басшысы Б.Төреханов, осы департамент басшысының орынбасары Г.Өтегенова, Қонаев қаласы әкімінің орынбасары Ж.Оңалбаев, Қонаев қаласының тұрғын үй-коммуналдық шаруашылығы және тұрғын үй инспекциясы бөлімінің басшысы Т.Ақмұрзаев, Қонаев қаласының мәслихат төрағасы С.Нұрқадыров, журналистер және қоғамдық бірлестіктердің өкілдері қатысты.
Баспасөз туры барысында қатысушылар «Қапшағай өңірінің газ желілері» ЖШС инвестициялық бағдарламасының іске асырылуымен танысты. Онда «Қапшағай өңірінің газ желілері» ЖШС директоры Батурин Абдримов баяндама жасады. Оның сөзінше, департамент тарапынан 2021-2025 жылдарға арналған жалпы сомасы 173225,58 мың теңгеге тең инвестициялық бағдарлама бекітілген, соның аясында өткен жылы бөлінген қаржы 35800,24 мың теңгені құраған. Серіктестік басшысының айтуынша, 2023 жылға арналған инвестициялық бағдарламада Қонаев қаласының 4 шағын ауданында ұзындығы 2,82 шақырым газ тарату желілерін жүргізу көзделген әрі ол толық орындалған. Газ тарату желілерін жүргізу нәтижесінде 787 абонент көгілдір отынға қосылған.
ЖШС директоры өзінің сөзін: «Бүгінгі таңдағы жағдай бойынша, биылға арналған 39 432,00 мың теңге сомаға бекітілген инвестициялық бағдарлама шеңберінде ұзындығы 2,5 шақырым Қонаев қаласының 3,4,5-шағын аудандарының төмен қысымды алаңішілік газ тарату желілерінің құрылысы аяқталды. Нәтижесінде 765 абонентті ілеспе газбен қамтамасыз етуге мүмкіндік туды. Негізінде нысанды толық көлемде аяқтау мерзімі – 2024 жылғы желтоқсан айы», – деп қорытындылады.
Бейбіт Мекеев
