Кеген ауданында көпті көрген асыл қарттарға айрықша құрмет көрсетілді. Өңірдің еңбек ардагерлері мен зейнеткерлеріне арнап жеңілдікпен медициналық қызмет көрсету шарасы ұйымдастырылды. Биыл Кегенде жалпы отыздан астам зейнеткер шипажайларда тегін ем алуға жіберілсе, он ардагерге Қарттар күніне орай «Жаркент-Арасан» медициналық сауықтыру кешеніне жолдама берілді. Мұндай мүмкіндікті сыйлаған аудан әкімі Нұрбақыт Теңізбаевқа қариялардың айтар алғысы шексіз.
Шипажайға жолдама алған 69 жастағы зейнеткер Бақытгүл Көнеева: «Жаркент-Арасан» кешеніне жеткенімізде шипажай қызметкерлері бізді жылы қарсы алды. Төрт мезгіл тамақ берілді, мұнда ем қабылдаушыларға айрықша көңіл бөлінеді екен. Мұнда алты күн ем қабылдадық. Маған ұнағаны – саз балшықпен емдеу. Оның буын аурулары мен суық тигенге тигізер пайдасы мол», – деп әсерімен
бөлісті.
Зейнетке шықса да, қоғамдық жұмыстан қол үзбей, ауданның өркендеуіне өз үлесін қосып жүрген қариялар айрықша қамқорлықты сезініп, ризашылығын білдіруде. Бұл ретте зейнеткер Досымхан Бидайбекова: «Жақсының жақсылығын айт, нұры тасысын!» демекші, Нұрбақыт баламыздың еңбегі жансын! Ауданымыз биіктен көрініп, жақсы істің жаршысы бола беруіне тілектеспіз!» – деді.
Шипажайға барған ақ жаулықты аналарымыз Бақытгүл Көнеева, Құралгүл Көбенбаева, Нұргүл Қызайбекова, Роза Батырханова, Науша Сасықова, Бақытгүл Байбатшаева емдерін ала жүріп, «Әжелер» тобын құрып, онда өткізілген «Алло, біз таланттарды іздейміз!» атты мәдени шараға қатысып, өз өнерлерін көрсетіп, 1-орынды жеңіп алды. Ал Есбол Рысбаев, Ермек Құрманғалиев, Мақатай Елжанов сынды ақсақалдарымыз волейболдан өткен спорттық жарыста жеңімпаз атанып, медициналық сауықтыру кешенінің Мақтау қағазымен марапатталды.
Қариялардың қоғамдық мәселелерге атсалысуда, жастарды тәрбиелеуде алар орны айрықша. Ардагерлер кейінгілерге жол көрсетіп, аудан мәртебесінің жоғары болуына өз үлестерін қоса бермек.
Дәурен ӘБУТӘЛІПОВ
Кеген ауданы
