Халықаралық қарттар күніне орай, облыс орталығындағы «Шарапат» арнаулы әлеуметтік қызмет көрсету орталығы қарамағындағы қызмет алушыларға арнап мерекелік шара өткізді. Бүгінде мұнда 116 адамға қызмет көрсетілсе, оның 82-сі зейнеткер, 34-і – мүмкіндігі шектеулі азамат, бұл қатарда 2 Ауған соғысының ардагері бар.
Мерейлі күні «Шарапат» арнаулы әлеуметтік қызмет көрсету орталығы, Алматы және Жетісу облыстарының мамандандырылған күзет қызметі басқармасы бірлесе ұйымдастырған шара қарияларымыздың қоғам мен мемлекет алдындағы еңбегін құрметтеу, олардың мәселелері мен қажеттіліктеріне және өмір сапасын арттыруға назар аудару әрі қамқор болуды көздейді. Қала әкімі мен қалалық мәслихат төрағасының құттықтау сөздерінен кейін ақ самайлы қарияларға арналған концерт басталып кетті.
Вальс королі Шәмшінің әнінен кейін алғашқы құттықтау сөз Қонаев қаласының әкімі Асхат Бердіхановқа берілді. Ол өз кезегінде Қонаев қалалық аналар кеңесінің төрайымы Дәметкен Нүсіпбековаға, облыстық Ауған соғысы ардагерлер ұйымының төрағасы Қанат Молдабергеновке, «Ардагерлер ұйымы» РҚБ-нің Қонаев қалалық филиалының төрағасы Базарбай Оралбаевқа, Қонаев қалалық ақсақалдар кеңесінің төрағасы Бейсетай Қашақбаевқа марапаттар табыстады.
Өскелең ұрпақ үшін әр салада өзіндік қолтаңбасын қалдырған көнекөз қарияларымыздың орны ерекше екенін ескере отырып, облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Ержан Байқоныс, Алматы және Жетісу облыстары МКҚБ бастығының орынбасары, полиция полковнигі Айбек Шайғазиев, облыстық ақсақалдар кеңесінің төрағасы Амангелді Беспаев, қалалық мәслихат аппаратының басшысы Серік Нұрқадыров, ҚР Еңбек және халықты әлеуметтік қорғау министрлігі еңбек және әлеуметтік қорғау комитеті Алматы облысы бойынша департаментінің басшысы Айдынжан Нарматов және басқалар ақ самайлы ақсақалдар мен әжелерге ізгі тілектерін жеткізді.
Орталық қызметін пайдаланушылардың қуанышы құрметіне «Жігіттер» тобының әншісі Мырзахан Маханов, эстрада жұлдызы Алтынбек Тәшімбетов, сондай-ақ мамандандырылған күзет қызметі басқармасының 2-полиция батальоны қызметкерлерінің өнерпаздар құрамасы әсем ән мен тәтті күй тарту етті.
Салтанатты шара соңын «Шарапат» арнаулы әлеуметтік қызмет көрсету орталығының директоры Ержан Әбдіразақов қорытынды сөзбен түйіндеп, орталықтағы қызмет алушыларды мерекелерімен құттықтап, сыйлықтар табыстады.
Мерекелік кеш мамандандырылған күзет қызметі басқармасының 2-полиция батальоны қызметкерлерінің өнерпаздары хорының орындауындағы Ғафу Қайырбековтің сөзіне жазылған Шәмші Қалдаяқовтің «Ана туралы жыр» әнімен тәмамдалды.
Бейбіт МЕКЕЕВ
