Павлодар қаласындағы «Шаңырақ» халық шығармашылығы орталығында өткен оқушылар арасындағы республикалық «Ұстаздық еткен жалықпас» атты айтыста қарасайлық жас ақын Рауан Нұршабеков бас жүлдені қанжығасына байлады. Дүбірлі дода танымал ақын әрі композитор, Қазақстан Жазушылар одағының мүшесі Асығат Тұрғанбеков жетекшілік ететін «Желдірме» ақындар мектебінің құрылғанына 20 жыл толуына арналды.
Ғалым Жайлыбай, Жарқынбек Амантай, Бейбіт Бөжен, Аспанбек Шұғатай және Қуанышбек Шарманов сынды елімізге белгілі қаламгерлер қазылық еткен ақындар айтысында еліміздің әр шалғайынан іріктеліп шыққан 12 оқушы шеберліктерін сынасты. Бұл ретте 7-11-сынып аралығында оқитын талапкерлер жастығына қарамастан, тамаша айтыс көрсете білгенін атап айту керек. Олардың әрқайсысы сөз бен саз өнеріне таласы бар екенін аңғарта отырып, тапқырлық пен ой жүйріктігін жиылған қауымға паш етті. Айтыскерлердің әрқайсысы да озық өнер көрсеткенімен, қазылар алқасының мүшелері Қарасай ауданына қарасты Әйтей ауылында орналасқан Б.Қосынов атындағы орта мектептің оқушысы, дарынымен ерекшеленген Рауан Нұршабековтің өнеріне жоғары баға берді. Осылайша, қарасайлық жас талапкер айтыстың бас жүлдесі мен 300 мың теңгелік сертификаттың иегері атанды.
Астаналық Айғаным Мақсұтхан бірінші орынға көтерілсе, Қостанайдан келген Нұрислам Рағат пен павлодарлық Мейіржан Баршынбай екінші жүлдені қанжығаларына байлады. Ал үшінші орын алматылық Ерасыл Сейітжан, қызылордалық Еламан Кенжеш және ақмолалық Сәттібек Серікболатұлының еншісіне бұйырды.
Оқушылар арасында өткен республикалық ақындар айтысының бас жүлдегері атанған Рауан Нұршабеков Қарасай аудандық Мәдениет үйіндегі жыршы-термешілер мектебінде тәлім алып жүргенін атап айту керек. Оларға ақын Аяулым Дүйсекенова дәріс беріп, ұлттық өнеріміздің қыр-сырын үйретуде. Былтыр облыс әкімінің қолдауымен ашылған мектеп өңірдегі дарынды балаларға тегін қызмет көрсетіп келеді. Бұл мектептен әлі талай талапты, талантты балалардың тәрбиеленіп шығары хақ.
Қуат Қайранбаев
Қарасай ауданы
