Тіл – халықтың қаны, жаны, тұтастай кескін-келбеті, бітім-болмысы. Ана тілінің қадір-қасиетін білген халқымыз оны ұлттың рухына, қазына-байлығына балаған. Адамды мұратына жеткізетін – ана тілі мен ата дәстүрі.
Тіл – егемендігіміздің тұғыры. Тіліміз болмаса, тәуелсіздігіміз де баянды болмас еді. Міне, сондықтан да ана тілін білу – әрбір қазақстандықтың міндеті. Ана тілін қадірлемеген халықтың болашағы бұлыңғыр. Тіл ділдің, діннің салт-дәстүрдің қайнар бұлағы екенін жадымызда ұстауымыз керек.
Қазақстанның болашағы – біз, яғни қазақ жастары дейміз. Ендеше, біздің міндетіміз қазақ тілінің мәртебесін өсіру болмақ. Ол үшін өзіміз ана тілінде сөйлеп, барша ісімізді қазақ тілінде жүргізуіміз керек. Мемлекет құрушы ұлт ретінде біз қазақ тілінің мәртебесін көтеруге атсалысуымыз қажет. Бұл ретте Қадыр Мырза Әлінің: «Өзге тілдің бәрін біл, өз тіліңді құрметте!» – деген ұлағатты сөзін шамшырақ етіп ұстағанымыз абзал. Әсіресе жастарға мемлекеттік тілді үйренуді міндеттеу қажет. Өйткені кейбір мекемелерде қазақ тілінде сауатты мәтін жазатын маманды табу қиын. Осыны қазақ жастары түсінсе екен дейміз. Әлі де болса, реті келсін-келмесін орыс тілінде шүлдірлейтін жастардың санасын оятуымыз керек. Оны отбасынан бастаған абзал. Осы тұста баланы ана тілінде оқытып, білім алуға жағдай жасау әрбір ата-ананың парызы дер едік. Ана тілі ананың ақ сүтімен әр қазақ баласының бойына сіңгенде ғана біз осы олқылықтың орнын толтыра аламыз.
Ұлт рухына айналған тілімізді құрметтеп, оған қызмет ету – парызымыз. Осы орайда әрбір адам оның дамуына үлес қосса, мемлекеттік тілдің мәртебесі арта түсері хақ.
Гүлжайнар Үсенова,
«Тіл» оқу-әдістемелік орталығы Қарасай аудандық филиалының оқытушысы
