Облыс әкімдігінде талғарлық жас талант Жомарт Оспаналыға Мемлекет басшысы Қасым-Жомарт Тоқаевтың атынан құнды сыйлық табыс етіліп, ізгі тілек жолданды. Осыған орай облыс әкімі Марат Сұлтанғазиев Жомартпен арнайы кездесіп, оның шығармашылығына жоғары баға берді.
Президенттің алғысына бөленген дарынды ұл кішкентай кезінен домбыраны жанына серік етеді. Мемлекет басшысына жазған хатында ол өнері туралы сөз қозғап, домбыра үйірмесіне қатысып, республикалық, халықаралық түрлі байқаулардан бас бәйге алғанын жеткізген. Шығармашылық шабытының шарықтауына өзі тәлім алатын домбыра үйірмесінің үлкен үлес қосқанын, соның арқасында шетелге дейін шығып бойындағы өнерімен өзгелерді тамсандырғанын да айтқан. 16 жастағы таланты, жалынды, қабілеті қарымды Жомарттың жазған хаты Мемлекет басшысының назарына ілігіп, жас дарынның шығармашылығы жоғары бағаланған. Түрлі өнер додаларында топ жарып жүрген Жомарттың шығармашылығы әлеуметтік желілерде де жарияланып, тыңдарманның оң бағасын алған. Күй тартқандағы керемет шеберлігі көпшілікті елітіп қана қоймай, болашағынан үлкен үміт күттіретін өнер иесі екенін аңғартады.
Кездесу барысында Марат Елеусізұлы Жомартқа Мемлекет басшысының ізгі тілегі мен құттықтауын жолдап, Президенттің атынан құнды сыйлықты тарту етті. Облыс басшысы ел мәдениетінің дамуына айрықша үлес қосып жүрген жастар мемлекетіміздің мақтанышы екенін айтып, біліммен қоса өнерге де ықыласы ауған балалардың болашағы зор екенін тілге тиек етті. Сондай-ақ Жомарттай жас таланттың қабілеті өз замандастарына үлгі екенін жеткізіп, Президенттің ыстық ықыласына ие болған өреннің өмір жолы жеңісті болуын тіледі.
Өз кезегінде Жомарт Оспаналы 6 жыл қатарынан домбыра үйірмесіне үздіксіз барып жүргенін, келешекте күй өнерінің майталманы болғысы келетінін айтты. Сондай-ақ тәуекел етіп өзі жазған хаттың елеусіз қалмайтынына сенгенін, Президенттің қолдауы өмірлік бағытын айқындап бергенін жасырмады. Көпшіліктің ыстық ықыласы өзі сияқты жастарды шабыттандырып қана қоймай, биік белеске жетелейтінін алға тартты. Мемлекет басшысының жылы лебізін жеткізген облыс әкіміне де алғысын айтып, сенім биігінен көрінуге тырысатынын жеткізді.
Құралбек СӘБИТОВ
