Ел Президенті Қасым-Жомарт Тоқаев былтыр Атырауда өткен Ұлттық құрылтайда: «Кітапхана – мемлекеттің, ұлттың негізгі жады. Еліміз үшін құнды тарихи деректер мен материалдардың дені кітапханада сақталады. Сондықтан кітапхана ісін дамытуға бейжай қарауға болмайды. Кітап оқырманға қолжетімді болуы керек», – деген болатын.
Мемлекет басшысының тапсырмасын жүзеге асыру бағытында Алатау қаласында жүйелі жұмыстар қолға алынуда. 2011 жылы ашылған Жетіген ауылдық кітапханасы былтыр шілде айында Алатау қалалық кітапханасы болып қайта жасақталды. Содан кейін жаңа қаланың «Арна» шағынауданында қалалық кітапхананың филиалы жұмысын бастаған еді. Жақында «Заречный» шағынауданында екінші филиал оқырманға есігін айқара ашты.
Кітапхананың салтанатты ашылу рәсімінде шағынауданның ақсақалы Балтабай Жұмаділов ақ батасын берді. Алатау қаласы әкімінің орынбасары Гүлбану Несіпбаева мен қалалық мәдениет бөлімінің басшысы Бибігүл Шәйкенқызы жаңа руханият ордасының лентасын қиды.
– Саналы ғұмырында 800-ден астам шығарма жазған америкалық жазушы Рэй Брэдбери «Кітапханалар болмаса не болар еді?» деген сұраққа: «Өткеніміз де, келешегіміз де болмас еді», – деп жауап берген екен. Сондықтан қазіргідей өскелең ұрпақты кітап оқуға бет бұрғызу үшін кітапханалардың атқаратын қызметі зор.
«Заречный» шағынауданындағы бұрынғы ауыл әкімдігінің ғимаратында тағы бір филиал жұмысын бастап отыр. Кітап қоры 7 мыңды құрайтын филиал жанынан келешекте оқырмандардың қызығушылығын арттыру мақсатында клубтар құру, «Парасат жолы» орталығының бұрышын ашу, іс-шара өткізу жоспарланып отыр. «Көш жүре түзеледі» демекші, алдағы уақытта кітапхана филиалына жеке ғимарат берілетініне сеніміміз кәміл. Өйткені 2050 жылға қарай Алатау қаласы халқының саны 2 млн-ға жуықтап, Алматы қаласымен бірге көпорталықты агломерациялық жүйе құра отырып, еліміздің ең ірі экономикалық орталықтарының біріне айналмақ. Осындай болашағы зор қаланың шағынаудан тұрғындарына кітап ұсынып қана қоймай, көптеген маңызды жұмыстарды атқарып, рухани байлықты байланыстыратын алтын көпір қызметін атқаратын боламыз, – деді филиал директоры Әнел Серікқызы.
«Заречный» шағынауданында ашылған қалалық кітапхана филиалының қызметкерлеріне кәсіби шеберлік пен парасаттылық, еңбектеріне шығармашылық табыс тілейміз
Айжарық КӨПТІЛЕУОВ
Алатау қаласы
