Наурыз мерекесін тойлаудың жаңа форматына сәйкес, «Наурызнаманың» онкүндігі аясында 17 наурыз – Шаңырақ күні болып бекітілген болатын. Бұл күн жарасымды жанұялардың береке-бірлігін насихаттау арқылы отбасы құндылықтарын кең көлемде дәріптеуде айрықша маңызға ие. Қазақта қара шаңырақ киелі ұғым болғандықтан, халқымыз шаңырақты әрдайым қастерлеп өткен. Себебі, осы шаңырақ арқылы ұлтымыздың тамыры тереңге жайылып, ынтымағымыз берік сақталды.
17 наурыз Кеген аудандық кітапханасының ұйымдастыруымен Жастар ресурстық орталығында «Шаңырақ» күні мерекесіне орай, «Шаңырақ-бүкіл қазақ елі үшін тіршіліктің, шексіз өмірдің нысаны» тақырыбында дөңгелек үстел өтті. Айтулы шараға ақ жаулықты аналармен ақ сақалды аталар, мектеп оқушыларымен кітапхана қызметкерлері қатысып, ұлттық нақыштағы игілікті іс-шараның куәсі болды.
Мақсаты отбасының берекесі мен жарасымдылығын атап өтуге арналған шара арқылы ұрпақтар арасындағы байланысты нығайту, ұлттық құндылықтарды дәріптеу және отбасылық дәстүрлерді сақтауға шақыру. Ұлттық мұраларымызды әспеттей отырып, жас ұрпақтың көңіліне ой салып, жүрегіне қазақы рең беру.
Іс-шара дәстүрлі әнші, Өжек Жаңабаев атындағы орта мектептің музыка пәнінің мұғалімі Ләззат Әбдіқадірқызы жетекшілік ететін «Ақжелең» жас күйшілер ансамбілінің орындауындағы халық күйі «Кеңес» және Құманғазының «Балбырауын» күйімен басталды.
Аудандық кітапхананың абономент бөлімінің меңгерушісі Жібек Молдасанова «Шаңырақ – бүкіл қазақ елі үшін тіршіліктің, шексіз өмірдің нысаны» тақырыбында баяндамасын оқып, мерекенің маңыздылығына тоқталып өтті. Библиограф Жаңылай Дәулетбай қатысушыларға мерекенің құрметіне жасақталған кітап көрмесімен және шаңырақ туралы арнайы слайдпен таныстырды.
Құттықтау сөз алғандар аудандық аналар кеңесінің төрағасы, «Белсенді ұзақ өмір орталығының» кеңесшісі Бақытгүл Көнеева, аудандық ардагерлер кеңесінің төрағасы Нұрлыбай Көпжасар, кітапханашы Зинагүл Күнесбай, Жастар ресурстық орталығының психолог маманы Гүлназ Толонқызы қазіргі қазақ отбасы мен шаңырақ ұғымы туралы өз ойларын бөлісті.
Аталған іс-шарада Сержант Жетпісбай, Арғынбай Шілікбаевтар айтулы мереке отбасы мен ұрпақ сабақтастығының, ата-аналардың балаларға деген жауапкершілігінің маңыздылығын түсінуге мүмкіндік беретіндігін тілге тиек етіп, көпшілікке «Наурыз баталарын» берді.
Отбасының ұйытқысы болып табылатын шаңырақты сақтау мен оны дәріптеуге бағытталған маңызды шара осылайша дәріптеліп, көпшілік отбасындағы шаңырақ шаттығы ортаймасын деген тілекпен тарқасты.
Дәурен ӘБУТӘЛІПОВ,
Кеген ауданы
