Өңірлік коммуникациялар қызметінің ақпараттық алаңында өткен баспасөз мәслихатында облыстық ПД Жергілікті полиция қызметі басқармасының бастығы, полиция подполковнигі Әбдінұр Тасыбаев 2025 жылдың I тоқсанында атқарылған жұмыстарды баяндады.
Ішкі істер министрлігі тарапынан «2025 жыл – профилактика жылы» деп жарияланды. Осыған орай елімізде қоғамдық тәртіпті сақтау, құқық бұзушылықтардың алдын алу бағытындағы жұмыстар жаңа серпін алды. Осыған сай облыс аумағында бірнеше бағытта кешенді жедел-профилактикалық іс-шаралар тұрақты түрде өткізіліп келеді. Атап айтқанда, «Қауіпсіз жол» және «Жасөспірім» акциялары барысында жол қауіпсіздігі, кәмелетке толмағандар арасындағы құқық бұзушылықтардың алдын алу бойынша кең ауқымды жұмыс атқарылған.
– «Қауіпсіз жол» жедел профилактикалық іс-шарасын өткізу барысында әкімшілік құқық бұзушылық деректері бойынша 249 көлік айыппұл тұрағына қойылды. Сонымен қатар, 407 көліктің мемлекеттік тіркеу нөмірінің белгілері алынды. Аталмыш іс-шара басталғалы облыста барлығы 8029 әкімшілік құқық бұзушылық анықталды. «Қауіпсіз жол» профилактикалық іс-шарасы әлі де жалғасады. Сондай-ақ «Құқық тәртіп» жедел-профилактикалық іс-шарасы өткізілді. Рейд барысында 62 қылмыстық әрекет тіркелді. Облыс бойынша барлығы 2714 әкімшілік құқық бұзушылық анықталды, – деді Әбдінұр Тасыбаев.
Ерзат АСЫЛ
