Кеген ауданындағы «Көлсай көлдері» мемлекеттік ұлттық табиғи саябағында Қазақстанның Мемлекеттік рәміздер күніне орай ұлттық спорт түрлерінен облыстық сайыс өтті. Алматы облысы дене шынықтыру және спорт басқармасы, облыстық бұқаралық-спорттық іс-шаралар өткізу орталығы ұйымдастырған кешенді жарысқа 10-18 жас және 18 жастан жоғары туристер мен демалушылар – барлығы 300 адам қатысты.
Қыздар мен әйелдер ләңгі тебу мен секіртпеден секіруде жарысса, ұлдар мен ерлерге гір тасын көтеру және армрестлингтен сайыс ұйымдастырылды.
Шара мемлекеттік рәміздерге саналы патриоттық құрмет қалыптастыру, барлық азаматты жасына қарамастан салауатты өмір салтына және бұқаралық ұлттық спорт түрлерімен шұғылдануға шақыру мақсатында ұйымдастырылды.
Жарыс аяқталған соң жеңімпаздар жүлдегерлер диплом және медальдармен марапатталды.
