Биыл ағартушылық жолда қазақтың сауатын ашқан қайраткер, «Айхай», «Дүние-ай», «Үш Меркі» сынды әндерді тудырған, сталиндік режимнің құрбаны болған Қапез Байғабылұлының туғанына 129 жыл толып отыр. Ол «халық жауы» атанып, 1939 жылы 45 жасында Коми АКСР-нің Ухта қаласында атылған.
Саяси қуғын-сүргін және ашаршылық құрбандарын еске алу күніне орай Кеген ауданы Тоғызбұлақ ауылында «Ұлтын сүйген ұлы тұлға – Қапез» атты кеш өтті. Келген қонақтар ең алдымен Мәдениет үйінде білікті ұстаз һәм талантты сазгердің өмірі мен шығармашылығынан сыр шертетін арнайы көрмемен танысты.
Кеген ауданының әкімі Нұрбақыт Теңізбаев, өнер зерттеушісі, филология ғылымдарының кандидаты Сағатбек Медеубекұлы, Мәжіліс депутаты, ҚР еңбек сіңірген қайраткері Жанарбек Әшімжан, «Ұлт үшін туған Ыдырыс», «Ақай Нүсіпбеков: Ғибратты ғұмыр», «Әлмереке абыз: тарих пен тағылым», «Шынжырлы Сәмен батыр» деректі фильмдерінің авторы, журналист Салтанат Бакеева және Қапез Байғабылұлының ұрпақтары жүрекжарды лебізін арнап, айтулы тұлғаның өміріне, шығармашылығына, қайраткерлігіне қатысты ой-пікірлерін ортаға салды. Кеш барысында алғаш рет Қапез туралы деректі фильм көрерменге ұсынылды.
Тағылымдық кештің маңыздылығына тоқталып өткен аудан әкімі Нұрбақыт Теңізбаев:
– Саяси қуғын-сүргінге ұшыраған бейкүнә жандардың рухына тағзым ету мақсатында Қапез атамыздың қазақ елі үшін жасаған еңбектерін, қиын қыстау кездегі өмірін баяндайтын деректі фильмді тұңғыш рет туған жеріне әкеліп көрсеткені үшін Салтанат Әуелханқызына зор алғысымды білдіремін! – дей келе, фильм авторының иығына камзол жауып, Алғыс хат табыс етті.
Мәжіліс депутаты Жанарбек Әшімжан қайраткер мұрасы еліміздің рухани қазынасы екенін тілге тиек ете келіп:
– Қапез Байғабылұлы арнайы мектеп ашты, бала оқытты, ұрпақтың парасатты болып қалыптасуына айрықша үлес қосты. Стамбұлда білімін шыңдаған. Әндері жүректерді тербеді. Осынау тарихи тұлғаның ұлт жадында сақталуына Сағатбек Медеубекұлы, Рамазан Стамғазиев, Тілеулес Құрманғалиев, арамыздан ерте кеткен Ғалымжан Досановтардың сіңірген еңбегі зор, – деді.
Шара соңында аудан өнерпаздары Қапездің әндерін нақышына келтіре орындап, құлақ құрышын қандырды.
Дәурен ӘБУТӘЛІПОВ
Кеген ауданы
