Гандболдан балалар мен жасөспірімдер арасында Алматы облысының чемпионаты мәресіне жетті. Іле ауданындағы спорт мектебінде өткен айтулы бәсекеде 2013 жылғы және одан кіші балалар, сондай-ақ 2010-2012 жылдары туған ұл-қыздар бақ сынады.
Ұйымдастырушылардың айтуынша, аталған жарыс балалар мен жасөспірімдер арасында салауатты өмір салты мен спортты кеңінен насихаттауға арналған. Сонымен қатар үздік шыққан спортшыларды облыстық құрама сапына қосып, биыл күзде өтетін ел чемпионатына тыңғылықты дайындау.
«Гандбол спорты ең алдымен жылдамдық пен ептілікті қажет етеді. Командалық ойын болғандықтан, әр спортшының өз міндеті бар. Олар жұдырықтай жұмылып, бір-біріне деген сенімдері нығайған жағдайда ғана жоғары нәтижеге қол жеткізеді. Мұндай жарыстар жас спортшылардың шеберлігін шыңдап, үлкен жарыстарда өнер көрсетуіне жол ашады. Бүгінгі таңда Қазақстан құрамасында Алматы облысының спортшылары аз емес. Бұл өңір спортының әлеуетін көрсетеді. Әсіресе, біздің «Алатау арулары» командасының жетістіктері айтуға тұрарлық, – деді ганболдан бас жаттықтырушысы Жанат Байарыстанова.
Жарыс қорытындысы бойынша, ұлдар арасында Іле ауданының спортшылары, ал қыздар арасында Еңбекшіқазақ ауданының командасы жеңімпаз атанды.
Айта кетейік, облыс чемпионатының өтуіне Алматы облыстық дене шынықтыру және спорт басқармасы, облыстық дене шынықтыруды және спортты дамыту орталығы, сондай-ақ облыстық гандбол федерациясы мұрындық болды.
