Бердібек Соқпақбаев атындағы Қонаев қалалық саябағында облыс әкімдігінің қолдауымен еліміздің танымал өнер майталмандары мен өңір өнерпаздарының қатысуымен «Ұлы дала мұрасы» атты концерттік бағдарлама көрермен назарына ұсынылды.
Сахна төрінде жиналған қауымды Ұлттық домбыра және Астана күнімен құттықтаған Төлеужан Ғұмаров қос мейрамның маңызына кеңінен тоқталды.
Алдымен сахна төріне шыққан күй өнерінің көсегесін көгертіп жүрген өнер тарланы, «Ақжауын» фольклорлы-этнографиялық оркестрінің көркемдік жетекшісі, Қазақстанның халық әртісі Секен Тұрысбек «Дарабоз» күйін орындап берді. Одан кейін қасиетті аспаптың үнін көркем көкжиекке ұластырып, ұлттық өнердің жаңа тынысы ашылуына атсалысып жүрген ұжымның бірі «Ақжауын» фольклорлы-этнографиялық оркестрі тыңдармандарға күй құдіретін сезіндіріп, көпшіліктің рухын бір көтеріп тастады.
Ал Астана күніне орай Ертай Ашықбаевтың сөзіне жазылған Қанат Айтбаевтың «Астана вальсі» әнін Сүйінбай атындағы облыстық филармонияның жезтаңдай әншілері Медет Урумбаев, Ардақ Әмірқұлова, Айбек Жекенов тамылжыта орындап, жұртшылықтың ыстық ықыласына бөленді.
Келесі кезекте «Адырна» және «Құлансаз», «Қонаев әуендері» ансамбльдері ән-жырдан шашу шашып, киелі сахнаны бимен көркемдеді.
Айжарық КӨПТІЛЕУОВ
