«AMANAT» партиясының «Алатау аманаты» жобасы өлкеміздің тау туризмін дамытумен бірге, өткенін жаңғыртуға да серпін бермек. Жанарбек Әшімжан, Айдос Сарым, Бақытжан Базарбек бастаған депутаттар тобы аталған бағдарламадағы гастрономиялық және этномәдени туризм орындарының бірі саналатын «Есік» мемлекеттік тарихи-мәдени музей-қорығына атбасын бұрды. Музейдің тыныс-тіршілігімен танысқан халық қалаулылары тақырыптық экспозициялық залдарды аралады.
Ең әуелі музей директоры Гүлмира Мұхтарова елордадан келген мәртебелі меймандарды тарихи құнды экспонаттармен таныстырып, жүзеге асып жатқан жаңа жобалар жайлы мағлұмат берді. Оның айтуынша, музейде Алтын адаммен бірге табылған түпнұсқа бұйымдар, оларды зерттеген, қалпына келтірген ғалымдар мен реставраторлар туралы егжей-тегжейлі мәліметтер сақталған. Сонымен қатар, музей-қорық экспозициясында қола дәуірден бастап орта ғасырларға дейінгі аралықты қамтитын жәдігерлер бар. Қазір «Есік» мемлекеттік тарихи-мәдени музей-қорығы Германия, Дания, Ресей, Қытай, Оңтүстік Корея сынды елдермен бірлесіп, ғылыми зерттеу, археологиялық қазба жұмыстарын жүргізуде. Өз сөзінде музей басшысы жүйелі жұмыс жүргізуге кедергі болатын жайттардың барын да жасырмады.
– 2023 жылдан бері қорық ғимараты жанынан Сапар орталығы салынып жатқан болатын. Қазір қаражаттың жоқтығына байланысты құрылыс жұмысы тоқтап тұр. Сондықтан тиісті қаржы көзі қарастырылып, құрылыс толық аяқталса деген ниеттеміз. Сондай-ақ Талхиз қалашығын қорғау, барлау, бақылау, зерттеу жұмыстарына қолдау көрсетілсе деген ойдамыз. Алтын адамның қаңқа сүйегін музейлендірсек деген жоспарымыз да бар. Қорық-музейінің қарамағындағы Рахат қалашығынан этноауыл салуды да көздеп отырмыз. Мұның барлығы төл тарихымызды танып-білуге зор мүмкіндік береді, – деді «Есік» мемлекеттік тарихи-мәдени қорық-музейінің директоры Гүлмира Мұхтарова.
Халық қалаулылары Атырауда өткен Ұлттық құрылтайда мемлекет басшысының өзі « Біз теңдессіз тарихи нысандарымызды жоюға жол бермей, мұқият қорғауымыз керек. Тарихи-мәдени мұра санатына кіретін нысандарға реставрация жасау ісін ретке келтіретін шараларды күшейткен жөн», – деп шегелеп тұрып тапсырғанын айтты. Соңында мәжілісмендер халқымыздың мәдени мұрасын, тарихи жәдігерлерін сақтау, оларды көпшілікке насихаттап отырған мұражай ұжымына алғыстарын білдіріп, жауапты министрлікке арнайы сауал жолдап, мәселені оңды шешуге ықпал етуге күш салатындарын жеткізді.
Ерзат АСЫЛ
Еңбекшіқазақ ауданы
