Сөгетілік өнегелі отбасының иесі Серік Шолпанбай ұрпақ сабақтастығын жалғастырып, құсбегілік өнерді насихаттап келеді. Жуырда ауданда өткен «Мерейлі отбасы» ұлттық байқауында үлгілі әулет бас жүлдені жеңіп алып, облыстық кезеңге жолдама алды.
Отан отбасынан құралатыны белгілі. Өйткені ұлттың ең негізгі іргетасы – отбасы. Әр әулет өз тілін, ділін, дінін қастерлеп, тәлім-тәрбиесін тереңге жайса, сол халықтың келешегі кемел болмақ.
Қазақ халқының «Ата көрген оқ жонар, шеше көрген тон пішер», «Ұяда не көрсең, ұшқанда соны ілесің», «Әкеге қарап, ұл өсер, шешеге қарап, қыз өсер» деген сынды ұрпақ тәліміне байланысты айтқан мақал-мәтелдері – отбасы тәрбиесінің негізі. Осыны берік ұстанатын Серік Шолпанбай отбасы – ұлттық тәрбиені ұлағат тұтқан әулет.
Отбасы туралы ой өрбіткенде Серік Шолпанбай: «Отбасым – менің тірегім, шағын мемлекетім. Сол мемлекетімде анам Динара Баетбайқызы бас болса, екі қарындасым Гүлнұр мен Айгерім – қос қанатым. Жарым Ақбота Кенжеғұловамен өмірге төрт перзент әкеліп, оларды сүйіспеншілікпен өсіріп, ата-баба құндылықтарын бойларына сіңіріп келеміз.
Менің отбасым – менің айнам. Күнделікті сол айнадан бәрін көріп, бақылап отырамын. Ұлдарым әжесімен кішкентай кездерінен қазақтың салт-дәстүрін бойларына сіңіріп өсті. Құсбегілік, тазылық, батагөйлік, спортшылық – олардың бір бойынан табылатын өнер. 10-сыныпта оқитын ұлым Мұқали – спорт шеберлігінен үміткер.
Отбасым түрлі іс-шараларға белсене қатысады. Соңғы барғаны – Дүниежүзілік көшпенділер ойыны, «Ауылым – алтын бесігім», «Ұлы дала жорығы». Көшпенділер ойынында 90 мемлекеттен қонақтар келіп, төл өнерімізге тәнті болды. Сонда қарындасым Айгерім Президентіміз Қасым-Жомарт Тоқаевтың қолынан Құрмет грамотасын алды. Отбасымыз ауыл, аудан, облыс, республика көлемінде марапат иелері атанып, ел құрметіне бөленіп жүр.
Әулетіміз халықтық дәстүрді жалғап, бүркіт, тазымен саят құрып, туризммен айналысамыз. «Жеті қазына» құсбегілер мұражайын ашқалы мектеп оқушылары, студенттер, шетелдік қонақтар көптеп келуде. Елшіліктермен етене жұмыс жасап, Ұлыбритания, Польша, Қытай, Венгрия, тағы басқа да елдерден Алғыс хаттар алдық. Сонымен қатар осы елдерге құсбегілікті насихаттап барып, Көк Туымызды желбіретіп, үлкен өнер көрсетіп, ел сүйіспеншілігіне бөленіп қайттық.
«Ұяда не көрсең, ұшқанда соны ілерсің» дегендей, құсбегілер пірі саналатын Шора және кәлпелік Демболсын бабалардың ұрпағы болған соң, қиын да қызық өнерді ұрпақтан-ұрпаққа жалғастырып, жандандырып келеміз», – деді.
Жалайыр Шора бабаның құс ұстау, оны үйрету, бүркіт баптау, құсты сынау, тағы басқа амал-айласы, тәжірибесі, тәсілі ерекше болған. Ол қыранның қайда мекендейтінін, қашан ұя басатынын өте жақсы білген. Басқа құсбегілердің бәрі өздеріне Шораны тәлімгер ұстаз тұтқан.
Бұл әулет – Шора бабаның ұрпағы. Сондықтан ұл, қыз демей, құсбегілік өнерді жақсы меңгеріп, үлкен жетістіктерге жетуде. Үлкен әкелері Мұхамет, Бекмұхан Англияға барып, 33 мемлекет қатысқан фестивальда жеңіске жетіп, көш бастап, ұлттық шерудің алдында жүрді. Кейінгі ұрпақ та құсбегілік өнерді бойларына сіңіріп, өсіп келеді.
Иә, өнегелі отбасы – елінің өркені, тірегі. Әр азамат жақсыдан үйреніп, жаманнан жиреніп, берік отбасының негізін қаласа, мемлекетіміздің керегесі кең, іргетасы мықты болары сөзсіз.
Анарбек БЕРДІБАЕВ
Еңбекшіқазақ ауданы
