Қонаев қаласында көрнекті қоғам қайраткері Дінмұхамед Ахметұлын еске алуға арналған панкратионнан төртінші республикалық турнир өтті. Жарыс «Спорт есірткіге, терроризмге және лудоманияға қарсы» ұранымен жалауын көтерді. Сайысқа Шығыс Қазақстан, Алматы, Жетісу облыстарынан, Алматы және Қонаев қалаларынан бес санат бойынша 8-17 жас аралығындағы спортшылар қатысты. Барлығы 12 команда, жүзге жуық спортшы бақ сынады.
Шараның салтанатты ашылуы Б. Соқпақбаев атындағы орталық саябақта өтті. Жарыстың құрметті қонақтары мен ұйымдастырушылар қатысушыларға сәттілік тіледі.
«Балалар мен жасөспірімдерді дене шынықтыру және спортпен жүйелі түрде айналысуға барынша көп тарту – салауатты өмір салтын қалыптастырудағы басты мақсат. Бұл міндетті ел Президенті Қасым-Жомарт Тоқаев алға қойған болатын. Қалада спорт алаңдарын салу бойынша үлкен жұмыс жүргізілуде, кросс-фитпен шұғылданам деушілер үшін үйірме мен орталықтар ашылуда. Көптеген жастың кәсіби және әуесқой спортпен айналыса бастағанын көрудің өзі ғанибет! Оның үстіне республикалық турнир ұлтымыздың біртуар перзенті Дінмұхамед Қонаевқа арналып отыр. Ол кісінің өмірі мен еңбек жолы – бәрімізге үлгі. Бүгінгі республикалық турнирде жарысқа қатысушылардың лайықты өнер көрсетуін, төрешілердің әділ саралауын, ал көрермендердің қызықты және тартысты ойын тамашалауын тілеймін», – деді Қонаев қаласының әкімі Асхат Бердіханов.
«Алматы облысында бүгінгі таңда 20 клуб жұмыс істейді, оның 3-еуі Қонаев қаласында. Онда балалар панкратион негіздерін меңгере алады. Әртүрлі жас санатындағы 2000-нан астам адам осы жекпе-жек түрлерімен айналысады. Үлкен жеңістер осындай турнирлерден басталатынын атап өткім келеді. Бұл қатысушылардың қай-қайсысы үшін спорттық тұрғыдан алға жасалған қадам. Олар кәсіпқой болған кезде Қонаев қаласында өткен турнирде қажетті тәжірибе жинақтап қайтқанын есіне алатын болады», – деді облыстық панкратион федерациясының президенті Талғат Ибрагимов.
Айта кетер болсақ, панкратион – Грециядан бастау алатын ежелгі жекпе-жек түрлерінің бірі. Ұзақ уақыт бойы ол ұмытылып келгенімен, қазір кең өріс жаюда. Бүгінде бұл қатаң ережелері бар толыққанды спорт түрі саналады. Аталмыш спорт түрінен бокс, каратэ, ушу-саньда, тай-боксинг, таэквондо сынды жекпе-жек өнерінің бірнеше әдісін көруге болады.
Жарыста 8 жастан 13 жасқа дейінгі спортшылар «Tradition» нұсқасы бойынша күресті. Онда аз жарақат алады және көптеген элементтерге тыйым салынады. Үлкен жігіттер «Панкратион – элита» нұсқасы бойынша бақ сынады. Жекпе-жек екі раундта өтті. 13 жасқа дейінгі балалар мен жасөспірімдер үшін 3 минут, жасөспірімдер үшін 4 минут берілді. Жарыс, шын мәнінде, тартысты әрі әсерлі өтті. Жеңіске үміткерлердің бірі – Омбыда өткен 2022 жылғы әлем кубогының күміс жүлдегері, панкратион бойынша ҚР үш дүркін чемпионы, Қонаев қаласының атынан қатысқан 14 жастағы Мейірман Жарылқасымов.
«Мен 5 жасымнан бастап аралас жекпе-жекпен айналысамын. Тоғыз жыл жаттығу барысында көп нәрсені үйрендім, республикалық және халықаралық турнирлерде жеңіске жеттім. Енді мен 42 келі салмақта өнер көрсетемін, әрине, жаңа қарсыласпен жекпе-жекке шығып, оның техникасын білу, күшті және әлсіз жақтарын байқау – қызықты. Менің мақсатым – ересектер санатында әлем чемпионы болу және кәсіби жекпе-жекте өнер көрсету», – деді панкратионнан ҚР спорт шеберлігіне үміткер Мейірман Жарылқасымов.
Тартысты өткен республикалық турнир қорытындысы бойынша жалпы командалық есепте 1-орын Қонаев қаласына, 2-орын алматылықтарға, 3-орын Талғар ауданының спортшыларына бұйырды.
Алма ТОПАНТАЙҚЫЗЫ
Қонаев қаласы
