Биыл Қазақстан халқын бір тудың астына біріктірген Конституцияның қабылданғанына 30 жыл толып отыр. Осынау мерейлі мереке қарсаңында Балқаш аудандық кітапханасында «Ата Заң – мемлекет кепілі» тақырыбында дөңгелек үстел өтті.
Балқаш аудандық кітапхана қызметкерлері ұйымдастырған іс-шарада қатысушылар кезекпен сөз алып: «Конституция мемлекетіміздің жарқын болашағын анықтап, соның нәтижесінде елдіктің қазығы қағылып, қабырғасы қаланды. Шаңырағымыз биіктеп, босағамыз бекіді. Заңы кемелденген, саясаты орнықты, қоғамы тұрақты, сыртқы және ішкі геосаяси ахуалы қалыптасқан іргелі елге айналдық», – деп еліміздің тәуелсіздік алған жылдардағы жетістіктеріне баса тоқталып, өз ойларын ортаға салды.
Басқосуда кеш қонақтары бүгінгі таңда елімізде қоғамдық тұрақтылық нығайып, әлеуметтік-экономикалық даму көрсеткіштері алға басып келе жатқанын тілге тиек етті. Дүниежүзіндегі озық ойлы қағида жарғыларымен теңесетін Конституциямыз кең-байтақ еліміздің өркендеуіне жол ашқанын әңгімеледі. Шара барысында М.Сеңгірбаев атындағы орта мектептің 6-сынып оқушысы Қарақат Ысқақ «Отан» әнін орындап, мерекелік кештің көрігін қыздырды.
Шын мәнінде, Ата Заң – әрбір қазақстандықтың құқығын қорғайтын, әділет пен теңдікті, мемлекет пен қоғам арасындағы келісімді бекітетін қасиетті құжат.
Конституцияның 30 жылдығы – тәуелсіз Қазақстанның өткені мен бүгінін бағамдап, болашағын бағдарлайтын маңызды кезең. Бұл – еліміздің жаңғыруына жол ашқан тарихи құжаттың өміршеңдігін дәлелдейтін уақыт.
Өз тілшіміз
Балқаш ауданы
