Қазақтың кең байтақ даласына көз салған жоңғар жаулаушылар көптеген қазақ балаларын ерте жетім қалдырды, солардың бірі Ұлы жүз Албан руының Шыбыл тармағынан тарайтын Татан батырдың ұлы Қарақұл батыр. Қоңырбөріктің басшысы болған Сейітқазы бидің тәрбиесінде болған Қарақұл жастайынан ел ісіне араласып, батырлығымен көзге түседі.
Жоңғарларға қарсы қасиетті Түркістан өңірінде болған соғысқа, Аңырақай шайқасына, Алматы, Тарбағатай өңірінде небір соғыстарға қатысқан батыр 103 жасында 1785 жылы дүниеден өтеді. Ұрпағы барда ер есімі мәңгі сақталып ұлықталады. Соның бір дәлелі 1999 жылы Ұйғыр ауданы Сүмбе ауылына орнатылған ескерткіші. Бүгінде батыр ұрпақтары осы ескерткіш жанына 500 ағаш отырғызып, жаңа саябақ ел игілігіне ашылып өмірден өткеніне 240 жыл болған батырға арнап ас берілді.
Игі шараға еліміздің түпкір-түпкірінен ұрпақтары жиналып қонақтарға жыр-терме, ән күйден шашу шашып, ат шаптырып, ұлттық спорт түрлерінен жарыстар ұйымдастырып бәйгі тікті. «Елінің еңсесі – ерімен биік» дегендей, ауызбірлігін сақтап, туған жерін көркейтуге атсалысып жүрген азаматтарға халық атынан алғыс айтылып марапаттар тапсырылды, солардың ішінде Қарақұл Татанұлының ұрпақтары Тұрсынов Сұлтанбек Тілеубердіұлы мен Молдахметов Дәулет Молдахметұлына батыр бабасын еске алу тойына қосқан үлестері үшін Uly Dala Altyn Adam akademiasy атынан «Алғыс хаттар» табысталды.
