Республика күні мерекесіне орай облыстық балаларды қолдау орталығының тәрбиеленушілері ерекше экологиялық және патриоттық акция өткізді. Игі іс-шара аясында балалар мен тәрбиешілер 25 көшет екті.
Егілген әрбір ағашқа «Бірлік», «Тәуелсіздік», «Достық», «Мақсат», «Арман» сынды ерекше атаулар берілді. Бұл атаулар еліміздің басты құндылықтарын – бейбітшілік, бірлік, еңбек пен үмітті бейнелейді. «Бастама тек экологиялық бағытта ғана емес, сонымен қатар жас ұрпақтың бойында отансүйгіштік пен жауапкершілік сезімін қалыптастыруға бағытталды. Балалар туған жерін көгалдандыруға өз үлестерін қосып, еліміздің егемендігі туралы декларацияның қабылданғанына 35 жыл толуына арнап мәңгілік естелік қалдырды. Әр ағаш – біздің ортақ болашағымызға жасалған қадам. Ол елімізбен бірге өсіп, көктей берсін!» – деді аталған орталықтың директоры Айгүл Жарқынбекова.
Балалар үйінің тәрбиеленушілері енді ағаштарды суғарып, күтіп баптайды. «Біздің жаңа қонысымыздың ауласы бұдан да әдемі әрі жайлы болады», – дейді балдырғандар. Қонаев қаласында жаңа заманауи балаларды қолдау орталығының құрылысы биыл аяқталып, қолданысқа берілген болатын. Онда асханалар, оқу және ойын бөлмелері, психолог кабинеттері, спорт және акт залдары бар. Орталықтағы балдырғандар жаңа отбасының ауласын жасыл желекпен көмкеруге күш салатындарын айтты.
Ерзат АСЫЛ
Қонаев қаласы
