Астананың 25 жылдық мерейтойына орай журналистерге ерекше құрмет көрсетілді. Елордадағы Егемен Қазақстан көшесінің бойында Журналистер саябағы ашылды. Жағымды жаңалық барша ақпарат саласының қызметкерлерін қуанышқа бөледі.
Саябақтың ашылу салтанатында Ақпарат және қоғамдық даму министрі Дархан Қыдырәлі сөз алып, журналистер қауымын құттықтады.
«Бұл журналистерге көрсетілген үлкен құрметтің бір көрінісі. Журналистер саябағының елорда күні қарсаңында «Егемен Қазақстан» мен «Казахстанская правда» орналасқан ғимараттың алдында ашылуының да символикалық мәні бар. Себебі биыл Астанаға 25 жыл толып отыр. Ал енді сол елордамыздың еңселі болуына ардагер журналистер еселі еңбек етті. Сондықтан бұл аллеяны ардагерлерге тарту ретінде қабылдап отырмыз», – деді Ақпарат және қоғамдық даму министрі Дархан Қыдырәлі.
Саябақтағы стеллада «Қазақ» газетінің негізін қалаған Алаш қайраткері Ахмет Байтұрсынов пен Қазақстанның Халық жазушысы, мемлекет және қоғам қайраткері Шерхан Мұртазаның бейнесі сомдалған. Сондай-ақ, еліміздегі негізгі ақпарат құралдарының атауы жазылған.
