Қарасай ауданы Абай ауылындағы Мәлік Ғабдуллин атындағы орта мектепте «Батырдың ізімен: жас ұрпақты отаншылдыққа тәрбиелеу» атты семинар-конференция өтті. Шара Кеңес одағының батыры, академик, жазушы Мәлік Ғабдуллиннің туғанына 110 жыл толуына орай ұйымдастырылды. Семинарға Ақмола облысының орталығы – Көкшетау қаласындағы батыр атындағы музейдің қызметкерлері мен аудан мұғалімдері қатысты.
Қонақтар алдымен білім шаңырағының фойесінде Құрманғазы атындағы ұлттық консерваторияның шәкірттерінен құрылған «Қазақия» атты этно-фольклорлық ансамблінің күмбірлеген күйін тыңдап, осы жерде орналасқан қолөнер көрмесімен танысты. Жергілікті қылқалам шеберлерінің даңқты тұлғаның өмірі мен қызметіне қатысты туындылары да келушілердің назарын аударып, қызығушылығын тудырды.
Ұлтымыздың біртуар тұлғасы Мәлік Ғабдуллиннің ерлік жолы мен қазақ ғылымына қосқан үлесін үлгі ете отырып, жас ұрпақты отаншылдыққа, рухани тұтастық пен адамгершілік құндылықтарға баулу, оқушылардың бойында батырдың өнегелі өмірінен тағылым алу қабілетін қалыптастыруды мақсат еткен алқалы жиынды мектеп директоры Айгүл Айнабекова ашып, бұл күнгі шарада ұлтқа қызмет етудің, ерлік пен парасаттың, ғалым мен ұстаздықтың биік өнегесі дәріптелетінін алға тартты.
– Мәлік Ғабдуллин – Екінші дүниежүзілік соғыста ерен ерлігімен дараланған Кеңес одағының батыры, елге қорған болған жауынгер. Ол сонымен қатар қазақ фольклортану ғылымының негізін қалауға зор үлес қосқан көрнекті ғалым, ұлағатты ұстаз, қоғам және мәдениет қайраткері. Оның сан қырлы еңбегі – халқына деген шексіз махаббаты мен адалдығының айқын көрінісі. Бүгінгі семинар даңқты тұлғаның өмір жолын, ғылыми мұрасын, педагогикалық қызметін терең танып, кейінгі буынға жеткізуге бағытталды, – деді Айгүл Айнабекова.
Шара барысында Көкшетау қаласынан арнайы келген Мәлік Ғабдуллин музейінің директоры Мұхамед Қонқаев мінберге көтеріліп, даңқты тұлғаның туған жерінің ыстық ықыласын жеткізді. Ол елімізде батыр атындағы 11 мектеп жас ұрпаққа білім мен тәрбие беріп келе жатқанын айтып, 2000 жылдан бері Мәлік Ғабдуллиннің есімімен аталатын осы мектеп ұстаздарына толағай табыс тіледі. Мектеп психологы Анар Нұрмашева болса психологиялық тренинг жүргізіп, жиналған қауымды бір серпілтіп тастады.
Семинардың келесі бөлімі көп жыл бойы Абай атындағы педагогикалық институтта еңбек етіп, мыңдаған ұстаз-шәкірттерді тәрбиелеген батырдың өмір жолы мен ғылымдағы табандылығын ұрпаққа өнеге ету мақсатындағы тәрбие сағаттарына арналды. Бұл бағытта қазақ тілі мен әдебиеті пәнінің мұғалімі Айжан Мансұрова «Бала тәрбиесі – ел болашағы: Ғабдуллин тағылымы» тақырыбында, ағылшын тілі пәнінің мұғалімі Венериян Саутова «Мәлік Ғабдуллиннің сан қырлы таланты: жауынгер, жазушы, педагог», химия пәнінің мұғалімі Әсем Ерманова «Ерлік – елге мұра, ұрпаққа ұран», ал тарих пәнінің мұғалімі Мәдина Мәменова мен физика пәнінің маманы Әсем Баянбаева «Батырға – тағзым, ұстазға – құрмет» тақырыбында дәріс беріп, пікірсайыстар өткізді.
Іс-шараның «Дебат» деп аталатын бөлімі де өте қызықты әрі тартысты өтті. «Жастарды әскер қатарындағы азаматтық борышын өтеуге міндеттеу керек пе, жоқ па?» деген сауал төңірегінде «Үкімет» және «оппозиция» арасындағы пікірталасқа қатысқан мектептің дебат клубының мүшелері сахна төрінде қызу тартыстың үлгісін көрсетті. Екі жақтың да бұлтартпас дәлелдер келтіре отырып айтылған уәждері мен сөйлеу шеберліктері жиналған қауымды сүйсіндірді. Бұл пікірталаста қазылар алқасының шешімі бойынша жеңіс «Әскерге бару-бармау әр азаматтың өз қалауы болуы керек» деген ойды қорғаған оппозицияның еншісіне бұйырды.
Көкшетау қаласындағы Мәлік Ғабдуллин музейінің қызметкері Мейрамгүл Жолаушинаның «М.Ғабдуллиннің «Қазақ баласы» қолжазбасына қысқаша шолу» атты баяндамасы мен мектептің жас журналистері дайындаған «Жарық жұлдыз бейнесі» атты бейнетаспа, 5-сынып оқушысы Арнұр Болаттың «Қобыланды батыр» жырынан оқыған үзіндісі де тағылымды әрі тартымды шыққанын айта кету керек.
Осыдан кейін республикалық «Жас ғабдуллиншілер» клубына жаңа мүшелер қабылдау дәстүрі жалғасын тапты. Бұл клубқа озат оқумен қатар үлгілі тәрбие көрсетіп, мектептің қоғамдық өміріне белсене араласқан үздіктердің үздігі қабылданатынын айта кету керек. Аталған клубтың жетекшісі Ақниет Қонарбай бастап, іс-шараның құрметті қонағы Мұхамед Қонқаев таңдаулы шәкірттерге М.Ғабдуллиннің бейнесі салынған төсбелгімен бірге арнайы алқа тақты. Соңынан мектеп директорының оқу ісі жөніндегі орынбасары Жайдар Жақып шараға қатысушылармен интеллектуалды ойын өткізсе, мектеп оқушыларынан құралған хор «Ғабдуллиншілер ұраны» әнін әуелете шырқап, әсерлі сәттерді тарту етті. Батырдың есімін иеленген мектептің оқушылары намыс пен парасаттың, ерлік пен елдіктің шежіресіне айналған Мәлік Ғабдуллиндей азамат болуға уәде етті.
Қуат Қайранбаев
Қарасай ауданы
