Райымбек ауданының орталығы Нарынқолда «Хантәңірі етегі – чемпиондар мекені» атты спорт майталмандарының форумы өтті. Осы өңірден шыққан, дүниежүзілік, еуропалық, азиялық, республикалық дүбірлі додаларда топ жарған, туған елінің абыройын аспандатуды азаматтық борышы санайтын саңлақтардың басын қосып, өнегелерін жасөспірімдерге үлгі ету мақсатында Райымбек ауданы әкімдігі ұйымдастырған шараның тәлімі зор, әсері мол болды.
Аспантау өңірінің чемпиондар мекені аталуының өзіндік мәні бар. Күрестен КСРО кубогінің иегері, Азия чемпионы, Шығыс және Орта Азия ойындарының екі дүркін, Азия кубогінің төрт дүркін жеңімпазы, Атланта Олимпиадасы мен әлем чемпионатының қола жүлдегері Мәулен Мамыров, КСРО спорт шебері, Қазақстанның еңбек сіңірген жаттықтырушысы Бекболат Бірбаев, қазақша күрес, дзюдо, самбодан КСРО спорт шебері Жантелі Мұқи, бокстан Париж Олимпиадасының қола жүлдегері, үш мәрте әлем чемпионы Назым Қызайбай, әлем чемпионы Гаухар Ермекбай, кикбокстан Еуропаның және әлемнің екі дүркін чемпионы Елмұрат Қайыпжанов, Бауыржан Момышұлы атындағы халықаралық турнирдің жеңімпазы Тимур Мүсірбаев, «Жәрдем-99» атты АҚШ, Өзбекстан, Тәжікстан, Қырғызстан, Ресей командалары қатысқан самбо күресінен халықаралық жарыстың абсолютті чемпионы Ерлік Жалбағаев, қазақ күресінен спорт шебері Жангелді Хамитов, зілтемір көтеруден әлем чемпионы Жасұлан Қыдырбаев, халықаралық дәрежедегі спорт шебері, Азия, әлем чемпионаттарының жүлдегері Еркін Сайдақов, қолкүрестен халықаралық дәрежедегі спорт шебері, Азия чемпионы, «Толағай» федерациясының негізін қалаушы Тимур Сыпатаев, бокстан жасөспірімдер арасындағы әлем чемпионы Толғанай Қасымқан, күрестен жасөспірімдер арасындағы чемпион Ибраһим Сықақбек, тағы басқа да ел мен жердің абыройын асқақтатып жүрген азаматтардың тізімін соза беруге болады. Олай болса, Тәңіртау етегінен түлеп ұшқан спорт майталмандарының басын қосып, жас ұрпаққа үлгі-өнегесін таратуды мақсат еткен аудан әкімдігінің бұл бастамасы құптауға тұрарлық.
Спортшылар форумы аудандық спорт кешенінде таулы өңірдің төл перзенті, қолкүрес спортының чемпионы Береген Сыпатаевтың 60 жасқа толған мерейтойы құрметіне арналған жарыстың ашылуымен басталды. Мерейтой иесі – қол- күрестен халықаралық талай дүбірлі додаларда жеңіс туын желбіретіп, Азияның алтын, әлемнің қола медалін иеленген бірегей тұлға. Аудан әкімінің орынбасары Жанарбек Жақсылық жарысқа үкілі үміт арқалап келген құрыш білек, сом темірдей бұлшық етті спортшыларға Береген ағаларының жолын берсін деген тілегін арнады. Аудан тұрғындары атынан мерейтой иесінің арқасына шапан жапты. Салтанат үстінде сонымен қатар Еркін Сайдақов, Мәулен Мамыров, Тимур Сыпатаев, басқа да спорт саңлақтары сөз сөйлеп, Береген Сыпатаевқа ыстық ықыласын жеткізді. Спортшылар білек күштерін сынауға кіріскен шақта аудандық Мәдениет үйінде негізгі шара – спорт майталмандарының форумы да басталды.
Чемпион жерлестерін Мәдениет үйінің өнерпаздары құрметпен қарсы алып, әсем әндерін тарту етті. Ақ кимешекті әжелер шашу шашты. Форумға келген меймандар ауданда туып, елінің туын желбірете білген спорт саңлақтарының кең залға қойылған суреттеріне көз тоқтатты. Спорт шеберлері мінберге көтеріліп, жетістіктері жайында сыр шертіп, ой тербеді. Қасиетті Тәңіртау етегінен бұдан кейін де майталмандар көптеп шыға берсін деген тілектерін айтты. Осынау шараны ұйымдастырып, өздеріне құрмет көрсетіп отырған аудан әкімдігіне жүрекжарды алғыстарын білдірді. Форумға жиналған қауым Мәдениет үйі өнерпаздарының әсем әні мен мың бұралған билерін тамашалады.
Форум аяқталғанша спорт кешеніндегі қолкүрес жарысы да өз мәресіне жетіп үлгерді. 14 команда қатысқан сайыс қорытындысы бойынша 70 келі салмақта білек күшін көрсеткен сарыжаздық Азамат Байұзақ бірінші, қақпақтық Мерей Нүсіпақын екінші, нарынқолдық Арман Сқали мен Айнидин Сайлаубай үшінші орындарды иеленіп, чемпиондық тұғырға көтерілді. Екінші айналымдағы 70 келі салмақ бойынша жамбылдық Елзат Саязбек бірінші, шалкөделік Бақдәулет Асан екінші, нарынқолдық Руслан Нұрғожа үшінші орыннан көрініп, мерейлері үстем болды. «Толағай» спорт федерациясы ұйымдастырған 10-11-сынып арасындағы бәсекеде арқан тартыстан С.Сауранбаев атындағы орта мектептің командасы бірінші, О.Жандосов орта мектебі екінші, М.Мақатаев атындағы орта мектеп үшінші орынды жеңіп алды. Төс көтеруден Көмірші орта мектебінің, ләңгі тебуден А.Барманбекұлы орта мектебінің оқушылары бірінші орындарды иеленді. Жеңімпаздарға чемпиондық белбеулер мен дипломдар, мерейтой иесінің отбасы тағайындаған арнайы сыйлықтар тапсырылды.
«Хантәңірі етегі – чемпиондар мекені» атты спорт майталмандарының форумы осылайша атына заты сай дәрежеде дүркіреп өтті.
Жұмабек ТҰРДИЕВ
Райымбек ауданы
