Бүгінде Ұлттық құрылтай – ұлттық идеологияны қалыптастырып, оны
бекемдейтін алаңға айналғаны анық. Қызылорда төрінде өткен Ұлттық
Құрылтайдың V отырысында Қазақстанның саяси реформасындағы маңызды
кезең болды. Бұл жерде тек күн тәртібіндегі әлеуметтік-экономикалық
мәселелер ғана емес, сонымен қатар билік құрылымындағы түбегейлі
өзгерістер, басқарудағы қоғамдық диалогтың рөлін күшейту және жаңа
мемлекеттік институттарды енгізу талқыланды. Мен жаңа Парламентке
Құрылтай атауының берілуін, Вице-президенттің тағайындауы және елдің
дамуының ең маңызды мәселелері бойынша тұрақты және кең қоғамдық
диалог үшін жаңа платформа ретінде халық кеңесінің құрылуын аса
маңызды шешім деп бағалар едім.
Құрылтайда көтеріліп жатқан мәселелердің ішінде әсіресе маған ұнағаны –
мәдениет пен өнер, тіл, кино және халқымыздың аса бағалы рухани-мәдени
құндылықтарын ЮНЕСКО-ның бүкіләлемдік мұралар тізіміне енгізу
мәселелері. Олар ешқашан өзектілігін жоғалтпайды. Өйткені ол мәселелер –
ұлттың жаны және халықтың тілі тәрізді. Құрылтайда Мемлекет басшысы
Қасым-Жомарт Тоқаев Абай ілімінің ұлттық болмысымыздың өзегі екенін
атап өтіп, Ұлы ойшылдың «Қара сөздерін» және Әл-Фараби, Ясауи ілімдерін
ЮНЕСКО-ның «Әлем жады» деректі мұралар тізіміне енгізу қажет екенін
жеткізді. Бұл аса көңілге қонымды пайым. Өйткені біздің Абай – адамзат
ақыл ойының көкжиегін кеңейткен тұлға.
Қысқасы, құрылтай қазақтың жадынан өшпеген, тарихтың тереңінен жеткен
қасиетті ұғым. Ол ел басына күн туған шақта, жер тағдыры таразыға
түскенде, жұрттың жадын бір арнаға тоғыстырған ұлы кеңес. Қазір уақыт
басқа, талап басқа. Бірақ мәселе сол – ел болу. Құрылтайдың қадірі – көптің
сөзін тыңдауда. Президент пәрменімен бекіген Сыр өңірінде өткен бесінші
құрылтай ел үмітін айтулы өзгерістерге бастайтын жолды айқынды деген
ойдамын.
Смағұл Елубай,
Қазақстанның халық жазушысы
