Ақиық ақын Мұқағали Мақатаевтың туғанына 95 жыл толуына орай Алматыдағы №39 балалар кітапханасында «Мұқағали – мәңгілік ғұмыр» атты әдеби кеш өтті. Шараға белгілі қаламгер, Қазақстан Жазушылар одағының мүшесі Нұрдәулет Ақыш, ҰҚК Шекара қызметі Алматы облысы бойынша департаментінің сержанттар құрамын даярлау бөлімінің әскери қызметшілері, Бауыржан Момышұлы атындағы №131 мектептің жоғары сынып оқушылары қатысты.
Кеште жазушы Нұрдәулет Ақыш Мұқағали поэзиясының көркемдік әлеміне, тілдік өрнегіне, образ жасау шеберлігіне кеңінен тоқталды. Сонымен қатар шарада ақын туралы шағын бейнеүзінді көрсетілді.
Нұрдәулет Ақыштың әдемі де сыршыл әңгімесінен кейін кезек алдымен жырқұмар өрендерге тиді. Сержанттар құрамын даярлау бөлімінде біліктілік курсынан өтіп жатқан келісімшарт қызметінің қатардағы жауынгері Жасұлан Молдырахманов ақынның «Шекарада» өлеңін мәнерлеп оқыды. Ал білімін көтеру үшін Ақтөбе облысы бойынша департаментінен келген ефрейтор Азамат Сәдірбай Мұқағалидың «Несіне асығады?» атты жүрек тербетер әнін гитарамен әуелете шырқап, тындарманның көңілін шалқытты. Батырдың есімін еншілеген білім ошағының өнерлі жастары де кем түспеді. Мектеп кітапханашысы Мәдина Мырзахметова бастап келген оқушылар ақын өлеңдерін жатқа оқыды.
Кеш соңында балалар кітапханасы атынан Жадыра Зәкірова жазушы Нұрдәулет Ақыш, сержанттар құрамын даярлау бөлімі бастығының тәрбие жұмыстары жөніндегі орынбасары, подполковник Азамат Биманов және Бауыржан Момышұлы атындағы мектептің кітапханашысы Мәдина Тортайқызын Алғыс хатпен марапаттады. Өз кезегінде подполковник А.Биманов кітапхана ұжымына департамент тарихынан сыр шертетін «Біз – Отанның берік қалқаны» кітабын сыйға тартты.
Тамара ДӘУЛЕТБАЕВА,
ҰҚК Шекара қызметінің запастағы подполковнигі
