Райымбек ауданындағы К.Байшығанұлы атындағы орта мектептің «Даңқ» залында еңбек ардагері Анаят Танабаевтың өнегелі өмірін жас ұрпаққа насихаттауға арналған тағылымды шара өтті.
Қызылшекара кеңшары кезінде ақтылы қой өсіріп, мемлекет экономикасының өркендеуіне лайықты үлес қосқан іргелі шаруашылық болатын. Жаздың аптап ыстығы мен қытымыр қыстың қыспағына қажыр-қайратын қарсы қоя білген еңбекқор жандардың қатарында Анаят Нұрәлімұлы да бар еді. Озат шопанның ел ырысын еселеу жолындағы ерен еңбегі «Құрмет белгісі» орденімен, медальдармен, түрлі дәрежедегі төсбелгілермен бағаланды.
Анаят Танабаевтың тағы бір ерекше қасиеті – сөз өнерін қастерлеп, халық даналығынан туған асыл мұраларды көпшілікке кеңінен насихаттап, шешендік өнерді қастер тұтқандығы. Батагөйлік дәстүрді қалыптастырып, тәлім-тәрбиенің, үлгі-өнегенің қайнар көзіне айналдыра білгендігі. Ғұмырын ғибратпен әспеттей білген абзал жанды жерлестері осындай ерекше қасиеттері үшін тіршілігінде құрметтеп, өмірден өткен шағында да емірене еске алатыны сондықтан.
Кеш шымылдығы Ақжол Өмірғали, Нұржан Тұрсын сынды мектеп оқушылары сахналаған әсерлі қойылыммен ашылды. Даланың даналығын бойына сіңірген қария бейнесі мен бүгінгі ұрпақ арасындағы өміршең байланысты шебер сомдап, көрерменге өнеге мен өсиеттің құндылығын ұғындырды. Келесі кезекте Еңлік Зікірия, Кәусар Шәкен, Рауан Әлғожа, Балнұр Нұрқанатқызы еңбек ардагерінің «Ұрпаққа мұра» кітабындағы өлеңдерін мәнерлеп оқыды. Балалардың орындауындағы ақ баталары да көптің көңілін толқытты.
Немересі Айбол атасының термесін домбырамен тебірене орындады. Қызылшекараға арнаған өлеңіне Еркін Серікұлы дейтін өнерлі азамат көзі тірісінде ән жазып қалдырған екен. Сол әнді осы ауылдың перзенті Ербол Жұмақанов шырқап, тыңдарманды әсерге бөледі.
Мектеп директоры Нұрбақыт Шәкенов, ауылдық ақсақалдар алқасының төрағасы Тұрсын Нүсіп, еңбек ардагері Гүлбара Бәшебаева, зейнеткер ұстаз Сағындық Сыдықов сөз сөйлеп, кеш кейіпкерінің қайырымдылығы мен еңбексүйгіштігін, елге жасаған қамқорлығын еске алды.
Анаят ағаның зайыбы, бүгінде 80 жастың сеңгіріне аяқ артқан Шолпанхан апа мен баласы Қанат осындай ұлағатты шараны ұйымдастырып отырған мектеп ұжымына, ұстаздар мен оқушыларға жүрекжарды алғыстарын жеткізді. Кеш барысында Анаят Танабаевқа арналған ескерткіш-тақтаның лентасы қиылып, шымылдығы сыпырылды. Осылайша, ерлік пен еңбекті, адами құндылықтарды ұлықтайтын «Даңқ» залы ұрпаққа ұлағат болар тағы бір құнды жәдігермен толықты.
Жұмабек ТҰРДИЕВ
Райымбек ауданы
