Жамбыл ауданында Ұзынағаш пен Жаңақұрылыс ауылдарының су басу қаупі бар уческелерінде алдын алу жұмыстары жүргізіліп жатыр. Мұнда көктемгі су тасқынының алдын алу мақсатындағы шаралар қаңтар айынан басталған. Жуырда тағы да бірнеше арық-арна мен көпір өткелдері мұздан, қардан, сондай-ақ, қоқыстан тазартылып, жағалаулары инерттік материалдармен толықтырылған. Атап айтқанда, Ұзынағаштың батысындағы жотадан ағатын еріген қар суы үшін жаңадан ұзындығы 40 метр арық қазылып, бұрынғы су жолы қалпына келтіріліпті. Осындай жұмыстарға Ұзынағаш ауылында орналасқан 28237 әскери бөлімінің 30 сарбазы және 2 техникасы, аудандық өртке қарсы қызмет бөлімінен 7 адам мен 2 техника, ауданның төтенше жағдайлар бөлімінен 4 адам мен 1 техника жұмылдырылған. Қажетті 5 тонна инерттік материал дайындалып, 400 дана қапқа салынған. Әкімдік қызметкерлері ауыл тұрғындарымен кездесіп, үйлердің қасынан өтетін арықтарды қоқыстан тазарту жұмыстарын көпшілік болып қолға алу керектігін түсіндіруде. Өйткені, белгілі болғандай, еріген қар суы ағатын арықтың кейбір тұстарын тұрғындар өздері қоқыспен, топырақпен бекітіп тастаған. Осы орайда азаматтардың өз қауіпсіздігі өздерінің қолында екенін жете түсініп, әркім айналасын таза ұстаулары тиіс.
Өткен апта аяғында күн жылынып, сенбіде жаңбыр жауып еді, Ұзынағаш пен Жаңақұрылыс ауылдарында тағы да су жайылды. Топырақтың тоңы әлі жібімегендіктен жауын-шашын жерге сіңе алмай, ойпаңдар көлкіген суға толған. Кей жерлерде арық арнасынан асып, көшеге жайылды. Үйлерінің ауласына су кірген тұрғындар біраз әбігерге түсті.
Жаңақұрылыс ауылындағы Абдолла Қарсақбаев атындағы орта мектептің тұсынан өтіп бара жатқанымызда, жан-жағына абыржи қарап тұрған апаны көріп, аялдадық.
«Мына суды тоқтататын адам бар ма екен өзі?! Ауламызды алып барады. Қолдан келер қайран жоқ», – деді Құрманжан апа.
Апамыз екі көшенің түйіскен бұрышындағы Ынтымақ көшесінде тұрады екен. Бала-шағасымен көшіп келгендеріне көп болмапты. Бұл маң қия болғандықтан, жоғарғы жақтан сарқырай келген су жол жиегіне жиналып, әрі қарай ағады. Осыдан үш аптадай бұрын да дәл осылай болыпты.
Жаңақұрылыс ауылының тұрғыны Жандостың айтуынша, ауылдағы Абдолла Қарсақбаев атындағы орта мектепті жотадан аққан қарғын су баспауы үшін арнайы арық қазылған. Алайда мектепті айналып өткеннен кейін төменгі, яғни, батыс жағында су жайылып, Көкбастау көшесіндегі үйлердің ауласына кірген. Ауыл азаматтары осыны атқарушы билік ескеріп, бір амалын қарастырса екен деген ұсыныс-назын білдірді.
Серік Сатыбалдиев
Жамбыл ауданы
