Қарасай ауданындағы «Анаға құрмет» музейінде Наурызнама аясындағы Ұлттық спорт күніне орай «Дәстүрлі спорт – денсаулық кепілі» тақырыбында мектеп оқушыларымен танымдық ойындар ұйымдастырылды.
Іс-шараның басты мақсаты – Қазақстандағы ұлттық спорт түрлерін дәріптеу, жас ұрпақты салауатты өмір салтына баулу. Аталған шараға Райымбек ауылындағы орта мектеп оқушылары мен Қырғауылды балабақшасының тәрбиеленушілері қатысты. Бұл күні жоспар бойынша балалар арасында ұлттық ойындардан жарыстар ұйымдастырылды. Жоғары сынып оқушылары асық атудан бәсекеге түссе, бүлдіршіндер ұмытыла бастаған қанталапай, бестемше ойындарына қатысып, арқан тарту сынды сайыстарда күш сынады. Ұлыстың ұлы күні – Наурыз мерекесіне орай ұйымдастырылған шара барысында балалар белсенділік танытып, күші мен ептілігін көрсетті. Ең бастысы, жас ұрпақ ұлтымыздың ұлық мерекесі жайында мол мағлұмат алып, дәстүрімізге біртабан жақындады.
Қуат Қайранбаев
Қарасай ауданы
