Қонаев қаласында жасөспірімдер арасында 3х3 баскетболынан облыстық чемпионат өтті. Жарысқа аймақтағы қалалар мен аудандардан келген командалар өзара мықтыны анықтады. Бұл турнирде үздік шыққан спортшылар облыс құрамасының сапына алынады.
Бүгінде 3х3 баскетболын облыстық дене шынықтыру және спорт басқармасы Баскетбол федерациясымен бірлесе отырып дамытуда. Мұндай додалар спортқа деген қызығушылықты арттырып, болашақта үлкен жетістіктерге жетуге септігін тигізеді.
«Көбісі әлі де 3х3 баскетболын стритбол деп атайды. Ереже бекітілгеннен кейін ресми түрде атауын өзгертіп, 3х3 баскетболына айналды. Алаңдағы үш ойыншыдан басқа да айырмашылықтар бар. Мысалы, ойын 10 минутқа созылады, торға жақын қашықтықтан доп соқсаң, бір ұпай беріледі. 3х3 баскетболынан әлем чемпионаты 2012 жылдан бері өткізіліп келеді. Бұл спорт түрі алғаш рет 2020 жылы Токиода өткен жазғы Олимпиада ойындарының бағдарламасына енді. Сондықтан 3х3 баскетболында да, классикалық баскетболда да біздің алдымызда маңызды міндет тұр», – дейді бас төреші Максим Шалаев.
Тартысты өткен баскетбол бәсекесінде Талғар ауданының командасы топ жарса, Қарасай ауданының командасы екінші, ал Ұйғыр ауданынан келген баскетболшылар үздік үштікті түйіндеді. Жеңіс тұғырынан көрінгендер кубок және медальмен марапатталды.
Ерзат АСЫЛ
