Астана қаласында өткен халықаралық «PRO.NRG FEST» ғылыми фестивалі аясындағы ITEX конгресінің республикалық кезеңінде Балқаш ауданы Б.Бейсекбаев атындағы мектеп-гимназиясының ұстаздары ұсынған «3D қазақ оюлары» жобасы үздік деп танылды. Нәтижесінде жоба авторлары Италияда өтетін әлемдік байқауға жолдама иеленді.
Осы қуанышты жаңалықты естіген Балқаш ауданының әкімі Азат Құтпанбетов өңір абыройын асқақтатқан ұстаздарды арнайы қабылдады. Кездесу барысында ол білім саласының дамуына қосқан үлестері үшін ризашылығын білдіріп, алдағы халықаралық додада сәтті өнер көрсетіп, жеңіспен оралуына тілектестік білдірді.
Балқаш аудандық ардагерлер кеңесінің төрағасы Бақыт Сқабаев, мәслихат төрағасы Кәдірбек Омаров, «Балқаш таза су» мекемесінің басшысы Бақытжан Қамзин және білім бөлімінің басшысы Гүлнара Мұқымова да ақ тілектерін ақтарды.
Осы орайда халықаралық «PRO.NRG FEST» ғылыми фестивалінде үздік деп танылған «Шабыт» командасының құрамы жайында айтар болсақ, олар – Б.Бейсекбаев атындағы мектеп-гимназиясының директоры Альвира Халықова бастаған ұстаздар – Меруерт Достемесова, Үміт Мырзағұлова, Аяулым Қуаныш. Қатысушылар ғылыми байқау барысында STEM бағыты мен ұлттық құндылықтарды ұштастырып, қазақтың дәстүрлі ою-өрнектерін заманауи 3D форматта ұсынған. Сөйтіп Италияның астанасы Рим қаласында өтетін халықаралық кезеңге жолдама алды.
Білікті ұстаздардың мұндай жетістігі жас ұрпаққа серпін беріп, олардың ғылым мен білімге деген қызығушылығын арттыра түсетіні сөзсіз.
Бақтығали ДӘУІТБАЙ
Балқаш ауданы
