Жастар – елдің ертеңі, болашақтың иесі. Ал елдің келешегі кітапқа деген құрметтен басталады. Мемлекет басшысы Қасым-Жомарт Тоқаев Түркістан қаласында өткен ІІ Ұлттық құрылтайда: «Шын мәнінде, кітап оқитын ел зиялы ұлтқа айналады. Біз жас ұрпақтың кітапқа құштарлығын оятуымыз керек», – деген болатын. Осы орайда жастар арасында кітап оқуды насихаттау мақсатында «Атамекен» тарихи-мәдени орталығында «Айбергенов жырлары – кітап әлемінің асыл мұрасы» атты шығармашылық кеш ұйымдастырылды.
Кеш қонақтары ретінде Қарасай атындағы орта мектептің оқушыларымен кездесуге филология ғылымдарының PhD докторы, доцент, Қазақстан Жазушылар одағының мүшесі Салтанат Айбергенова, республикалық «Дәстүр» журналының бас редакторы Сәлия Әбдікәрімова, сондай-ақ ҚР Еңбек сіңірген қайраткері, әнші-сазгер Гүлмайдан Сүндетқызы арнайы қатысты.
Салтанат Төлегенқызы әкесінің кітаптарынан көрме ұйымдастырып, небәрі 30 жыл ғұмыр кешсе де, қазақ поэзиясына өлшеусіз үлес қосқан ақынның өмірі мен шығармашылығы туралы әсерлі естелігімен бөлісті. Сонымен қатар оқушылардың сұрақтарына жауап беріп, «Атамекен» тарихи-мәдени орталығының кітапхана қорына әкесі Төлеген Айбергеновтің кітаптарын сыйға тартты. Ал оқушылар өз кезегінде ақынның өлеңдерін жатқа оқып, құрметтерін көрсетті.
Кеш барысында әнші-сазгер Гүлмайдан Сүндетқызы Төлеген Айбергеновтің халық арасында кең тараған әндерін домбыраның сүйемелдеуімен орындап, кештің көркін қыздыра түсті.
Ұлттық кітап күніне орай оқушыларға кітаптың маңызы туралы қызықты мәліметтер де ұсынылды. Қазақ тіліндегі кітап басып шығару ісінің 200 жылдан астам тарихы бар екені айтылып, қазақ кітаптары алғашында араб қарпімен, кейін қысқа уақыт латын әліпбиімен, ал 1939 жылдан бастап кирилл қарпімен жарық көре бастағаны атап өтілді.
Поэзия әлеміне көз жүгіртсек, Төлеген Айбергенов – қысқа ғана ғұмырында қазақ өлеңіне тың жаңалық әкелген ақын. ХХ ғасырдың 60-жылдарына дейін өлеңдер көбіне 8-11 буынды болып келсе, ақын өз шығармаларын 18-19 буынды үлгіде жазып, поэзияға жаңа леп әкелді. Оның шығармашылығын Мұхтар Шаханов, Фариза Оңғарсынова, Есенғали Раушанов, Ұлықбек Есдәулет сынды ақындар жоғары бағалап, ұстаз тұтты.
Ақын өмірден ерте өтсе де, артында өшпес мұра қалды. Оның жырлары оқырман жүрегіне жол тауып, жас ұрпақпен бірге мәңгі жасай бермек.
Жанар Қалибекқызы,
«Атамекен» орталығының бас экскурсия жүргізушісі
Қарасай ауданы
